අද (මාර්තු 3) උදෑසන කුරුවිට පොලිස් වසමේ අඩවිකන්ද ප්‍රදේශයේදී, එරත්න සිට අඩවිකන්ද දක්වා ධාවනය වෙමින් තිබූ පාසල් වෑන් රථයක් පාලනයෙන් ගිලිහී ගසක ගැටීමෙන් අනතුරක් සිදුවී ඇත.

අනතුර සිදුවන අවස්ථාවේ වෑන් රථයේ වයස අවුරුදු 11 ත් 14 ත් අතර පාසල් සිසුන් 14 දෙනකු සහ කාන්තාවක් ගමන් කර ඇති අතර, තුවාල ලැබූ පාසල් සිසුන් කිහිපදෙනකු සහ වෑන් රථ රියදුරු ප්‍රතිකාර සඳහා එරත්න ග්‍රාමීය රෝහලට ඇතුළත් කර ඇත.

පොලිසියට අනුව, තුවාල ලැබූ දරුවන්ගෙන් 10 දෙනකු ප්‍රතිකාර ලබා රෝහලෙන් පිටව ගොස් ඇති අතර, පිරිමි දරුවන් දෙදෙනකු, ගැහැණු දරුවන් දෙදෙනකු සහ වෑන් රථ රියදුරු වැඩිදුර වෛද්‍ය ප්‍රතිකාර සඳහා රත්නපුර ශික්ෂණ රෝහලට මාරුකර යවා ඇත.

සිද්ධිය සම්බන්ධයෙන් කුරුවිට පොලිසිය පරීක්ෂණයක් ආරම්භ කර තිබේ.