හිටපු ක්‍රිකට් ක්‍රීඩකයකු වන සචිත්‍ර සේනානායකගේ පන්නිපිටිය කලල්ගොඩ පිහිටි නිවසේ සොරකමක් සිදුව තිබේ.

තලංගම පොලිසිය පවසන්නේ සචිත්‍රගේ නිවසට පැමිණ ඇති සොරුන් එහි තිබූ වටිනා භාණ්ඩ කිහිපයක් පැහැරගෙන ගොස් ඇති බවයි.

මිල අධික ඔරලෝසු, ටැබ්ලට් උපාංග, රන් භාණ්ඩ සහ මුදල් ද එම නිවසින් සොරාගෙන ඇති බව වාර්තා වේ.

අපරාධකරුවන් නිවසට ඇතුළුවීමට පෙර ආරක්ෂක කැමරා පද්ධතිය අක්‍රිය කර ඇති බව පොලිස් පරීක්ෂණවලදී අනාවරණ වී තිබේ.

සචිත්‍ර තම පවුලේ අය සමඟ නිවසින් බැහැරව සිට පසුදා සවස ආපසු පැමිණි අවස්ථාවේ විදුලිය විසන්ධි වී ඉදිරිපස දොර විවෘතව තිබෙනු දැක තිබේ.

ඒ අනුව කළ පැමිණිල්ල මත මෙම කොල්ලය සම්බන්ධයෙන් තලංගම පොලිසිය විමර්ශනයක් ආරම්භ කර ඇත.