අන්තර්ජාල ආරක්ෂණ පනත් කෙටුම්පත අනුමත කිරීමට පෙර ඒ පිළිබඳ සාකච්ඡා කිරීමට පක්ෂ නායක රැස්වීමක් කැඳවන ලෙස සමගි ජන බලවේගය කථානායක මහින්ද යාපා අබේවර්ධනගෙන් අද ඉල්ලා සිටියේය.

මාධ්‍ය හමුවකදී මේ සම්බන්ධයෙන් කරුණු දැක්වූ සමගි ජන බලවේගයේ පාර්ලිමේන්තු මන්ත්‍රී හර්ෂණ රාජකරුණා කියා සිටියේ ශ්‍රේෂ්ඨාධිකරණය නිර්දේශ කර ඇති ඇතැම් සංශෝධනවලට රජය ඉඩ ලබාදී නොමැති බැවින් අන්තර්ජාල ආරක්ෂණ පනත් කෙටුම්පත සම්බන්ධයෙන් සාකච්ඡා කිරීමට පක්ෂ නායක රැස්වීමක් කැඳවන ලෙස කථානායකවරයාගෙන් ඉල්ලා සිටීමට තම පක්ෂය තීරණය කර ඇති බවයි.

“ශ්‍රේෂ්ඨාධිකරණය විසින් නිර්දේශ කරන ලද ඇතැම් සංශෝධන සිදු කර නොමැති බැවින් කථානායකවරයා විසින් ඔන්ලයින් ආරක්ෂණ පනත් කෙටුම්පත අනුමත නොකළ යුතුයි. ඒ නිසා අපි කථානායකවරයාගෙන් ඉල්ලා සිටිනවා පනත් කෙටුම්පත අනුමත කිරීමට පෙර ඒ ගැන සාකච්ඡා කිරීමට පක්ෂ නායක රැස්වීමක් කැඳවන ලෙස” රාජකරුණා මන්ත්‍රීවරයා පැවසීය.

“අදාළ සංශෝධන සිදු කිරීමට පෙර කථානායකවරයා පනත් කෙටුම්පත අනුමත කළහොත් ව්‍යවස්ථාදායකය සහ අධිකරණය අතර ගැටුමක් ඇති වනවා,” ඔහු වැඩිදුරටත් පැවසීය.

කෙසේවෙතත්, ඉඩ ලබා දී නොමැති සංශෝධන ගෙනහැර දැක්වීමට මන්ත්‍රීවරයා අසමත් විය.

ඒ සමගම කථානායකවරයා පනත් කෙටුම්පත අනුමත කළත් කළ හැකි වැඩි දෙයක් නොමැති බව ද රාජකරුණා මන්ත්‍රීවරයා පිළිගත්තේය.

“සියලු සංශෝධන සිදුකිරීමට පෙර කථානායකවරයා විසින් පනත් කෙටුම්පත අනුමත කිරීම අධිකරණයට අපහාස කිරීමක් ලෙස සැළකිය නොහැක්කේ ව්‍යවස්ථාදායකය උත්තරීතර බව පිළිගත් තත්ත්වයක් පවතින බැවින්. අධිකරණයට ව්‍යවස්ථාදායකයේ කටයුතුවලට මැදිහත් වෙන්න බැහැ,” ඔහු මේ සම්බන්ධයෙන් ප්‍රකාශ කළේය.