2024 වර්ෂය තුළ මෙරටින් 312,836 දෙනෙකු රැකියා සඳහා විදේශගත වී තිබේ.

එය 2022 වසරේ පැවති ඉහළම අගය අභිබවා යන නව වාර්තාවක් සනිටුහන් කරන බව ශ්‍රී ලංකා විදේශ සේවා නියුක්ති කාර්යාංශය පවසයි.

2024 දී පිරිමි ශ්‍රමිකයන් 185,162ක් සහ කාන්තා ශ්‍රමිකයන් 127,674ක් රැකියා සඳහා විදේශ ගත වී ඇත.

ශ්‍රී ලාංකික ශ්‍රමිකයන් වැඩිම සංඛ්‍යාවක් ගොස් ඇත්තේ කුවේටයට වන අතර එම සංඛ්‍යාව 77,546ක් වේ.

ශ්‍රමිකයන් 51,550ක් එක්සත් අරාබි එමීර් රාජ්‍යය වෙත ගොස් ඇත.

දකුණු කොරියාව, ඊශ්‍රායලය සහ ජපානය වැනි රටවල රැකියා සොයන ශ්‍රී ලාංකිකයන්ගේ වැඩි ප්‍රවණතාවක් දැකිය හැකි බව සංඛ්‍යාලේඛන පෙන්වාදෙයි.

2024 දී ශ්‍රී ලාංකිකයන් දකුණු කොරියාවට 7,098ක්, ඊශ්‍රායලයට 9,665ක් සහ ජපානයට පුද්ගලයන් 8,665ක් රැකියා සඳහා ගොස් ඇත.

විදේශගත ශ්‍රමිකයන්ගෙන් ලැබෙන විදේශ විනිමය ඉපැයීම් ද සැළකිව යුතු ලෙස ඉහළ ගොස් ඇති අතර, 2024 නොවැම්බර් මාසය අවසන් වන විට ශ්‍රී ලංකාවට ඩොලර් මිලියන 6,462ක් විදේශගත ශ්‍රමිකයන්ගෙන් ලැබී තිබේ.

සාපේක්ෂව, 2023 දී ශ්‍රී ලාංකිකයන් 297,584ක් රැකියා සඳහා විදේශගත වී ඇති අතර, ඒ පිරිමි ශ්‍රමිකයන් 164,680ක් සහ කාන්තා ශ්‍රමිකයන් 132,904ක් වශයෙනි.