පාර්ලිමේන්තු මන්ත්‍රීවරුන්ගේ විශ්‍රාම වැටුප් ක්‍රමය අහෝසි කිරීම ඇතුළු කරුණු ගණනාවක් සම්බන්ධයෙන් පෞද්ගලික මන්ත්‍රී යෝජනා ගණනාවක් පාර්ලිමේන්තුවට ඉදිරිපත් කර තිබේ.

වතු මාර්ග රජයට පවරා ගැනීම, සමුපකාර සඳහා භාණ්ඩ මිලදී ගැනීමේ ක්‍රියාවලිය සඳහා නිසි ප්‍රසම්පාදන වැඩසටහනක් සකස් කිරීම, රජයේ සහල් සංචිතයක් පවත්වා ගැනීම සඳහා කටයුතු සම්පාදනය කිරීම සහ කොවිඩ්-19 වසංගතයෙන් මියගිය අයගේ දේහ ආදාහනය කිරීම පිළිබඳ විමර්ශනය කිරීම ආදියද මෙම යෝජනාවන්ට අයත්ය.

මෙම යෝජනා පෙබරවාරි 7 වැනි දින පෙ.ව. 11.30 සිට ප.ව. 5 දක්වා විවාදයට ගැනීමට නියමිතය.

වතු මාර්ග රජයට පවරා ගැනීම පිළිබඳ යෝජනාව සමගි ජන බලවේගයේ මන්ත්‍රී හේෂා විතානගේ විසින් ඉදිරිපත් කර ඇති අතර, සමුපකාර සඳහා භාණ්ඩ මිලදී ගැනීමේ ක්‍රියාවලිය සඳහා නිසි ප්‍රසම්පාදන වැඩසටහනක් සකස් කිරීම පිළිබඳ යෝජනාව එම පක්ෂයේම මන්ත්‍රී කිංස් නෙල්සන් විසින් ඉදිරිපත් කර තිබේ.

රජය සන්තකයේ සහල් සංචිතයක් පවත්වාගෙන යෑම සඳහා කටයුතු සම්පාදනය කිරීම පිළිබඳ යෝජනාව ඉදිරිපත් කර ඇත්තේ සමගි ජන බලවේගයේ මන්ත්‍රී රෝහණ බණ්ඩාර විසිනි.

කම්කරු සුභසාධන නිලධාරීන් පත් කිරීම සඳහා නිසි ක්‍රමවේදයක් සකස් කිරීම පිළිබඳ යෝජනාව සමගි ජන බලවේගයේ මන්ත්‍රී චමින්ද විජේසිරි විසින් ඉදිරිපත් කර ඇති අතර, මන්ත්‍රීවරුන්ගේ විශ්‍රාම වැටුප් ක්‍රමය අහෝසි කිරීම පිළිබඳ යෝජනාව නව ප්‍රජාතන්ත්‍රවාදී පෙරමුණේ මන්ත්‍රී රවී කරුණානායක විසින් ඉදිරිපත් කර ඇත.

කොවිඩ්-19 වසංගතයෙන් මියගිය අයගේ මළ සිරුරු භූමදානය කිරීම වෙනුවට ආදාහනය කිරීම සම්බන්ධයෙන් විමර්ශනය කර සුදුසු නිර්දේශ ඉදිරිපත් කිරීම සඳහා පාර්ලිමේන්තු තේරීම් කාරක සභාවක් (PSC) පත් කිරීම පිළිබඳ යෝජනාව සමගි ජන බලවේගයේ මන්ත්‍රී නීතිඥ රවුෆ් හකීම් විසින් ඉදිරිපත් කර ඇත.