June 28, 2024
නීතිවිරෝධී ලෙස ලෝහ, යකඩ, ඒ ආශ්‍රිත උපකරණ සහ අබලි ද්‍රව්‍ය අපනයනය වැළැක්වීමේ පියවරක් ලෙස සියලුම ලෝහ අපනයනය සඳහා කර්මාන්ත අමාත්‍යාංශයේ අනුමැතිය ලබා ගත යුතු බව මුදල් රාජ්‍ය ඇමැති රංජිත් සියඹලාපිටිය පවසයි.
ඔහු මේ බව ප්‍රකාශ කළේ ලෝහ ආශ්‍රිත කර්මාන්තය නියෝජනය කරන නිලධාරීන් පිරිසක් සමග කර්මාන්ත අමාත්‍යාංශය සහ ශ්‍රී ලංකා රේගු දෙපාර්තමේන්තුවේ සහභාගිත්වයෙන් අමාත්‍යාංශයේ පැවැති රැස්වීමකදීය.
ලෝහ අපද්‍රව්‍ය, යකඩ ආශ්‍රිත උපකරණ සහ තඹ, පිත්තල, ඇලුමිනියම්, චීනචට්ටි සහ සුදු යකඩ වැනි අබලි ද්‍රව්‍ය නීතිවිරෝධී ලෙස අපනයනය කිරීම හේතුවෙන් සිදු වූ මූල්‍ය පාඩු පිළිබඳ ඇමැතිවරයා මෙම හමුවේදී අවධාරණය කර තිබේ.
අවසර ලත් ලෝහ ආශ්‍රිත අපනයන සහ අපනයන තත්ත්වයන්ට සුදුසු භාණ්ඩ හඳුනාගැනීම සඳහා ගැසට් නිවේදනයක් නිකුත් කිරීමට සූදානම් වන බවද ඔහු සඳහන් කර ඇත.
සියලුම නීතිවිරෝධී ප්‍රතිඅපනයන නවතා දමන බවත්, ඉදිරියේදී ලෝහ, යකඩ ආශ්‍රිත උපකරණ සහ පරණ ද්‍රව්‍ය ප්‍රතිඅපනයනය කිරීම සඳහා කර්මාන්ත අමාත්‍යාංශයේ නිර්දේශ අවශ්‍ය වන බවත් ඇමැතිවරයා වැඩිදුරටත් ප්‍රකාශ කර තිබේ.
