එළැඹෙන ක්‍රීඩා සමාජ රග්බි තරග වාරයට පෙර දේශීය රග්බි විනිසුරුවන්ගේ තරග විනිශ්චය කිරීමේ ප්‍රමිතිය ඉහළ නැංවීම සඳහා නවසීලන්තයේ ප්‍රමුඛ පෙළේ රග්බි විනිසුරුවරුන් කණ්ඩායමක් ශ්‍රී ලංකාවට පැමිණ තිබේ.

ක්‍රීඩා අමාත්‍යාංශයේ අනුග්‍රහය ඇතිව ශ්‍රී ලංකා රග්බි පාපන්දු විනිසුරුවන්ගේ සංගමය සහ ශ්‍රී ලංකා රග්බි සංගමය සමඟ එක්ව දැනට නවසීලන්තයේ පදිංචිව සිටින ශ්‍රී ලංකාවේ උපත ලද ක්‍රිෂාන් අඹවත්තගේ නායකත්වය යටතේ මෙම වැඩසටහන සංවිධානය කර ඇත.

ඒ අනුව පැමිණ සිටින පළපුරුදු නවසීලන්ත රග්බි විනිසුරුවන් දේශීය විනිසුරු සහ ක්‍රීඩා සමාජ පුහුණු කිරීමේ ප්‍රමිතීන් ඉහළ නැංවීමේ අරමුණින් දින 24ක විනිසුරු සංවර්ධන සහ පුහුණු වැඩසටහනකට සහභාගී වනු ඇත.

‘බේ ඔෆ් ප්ලෙන්ටි’ රග්බි සංගමයේ සාමාජිකයන් වන නවසීලන්ත රග්බි විනිසුරුවන් 2024/25 ශ්‍රී ලංකා ක්‍රීඩා සමාජ රග්බි වාරයට පෙර තීරණාත්මක පුහුණුවක් ලබා දීමට නියමිතය.

මෙහි පරමාර්ථය වන්නේ රට පුරා විනිසුරුවන් ඉහළ ප්‍රමිතීන්ට සහාය වීම සඳහා වැඩිදියුණු කළ කුසලතා සහ දැනුම ඇති ශ්‍රී ලාංකික විනිසුරුවන් ලෙස සූදානම් කිරීමයි.

මෙම උත්සාහයට සම්බන්ධ වන විශේෂඥයන් අතර සිටින සෑම් ෆෙලෝස් යනු ඕක්ලන්ඩ්, වයිකාටෝ සහ දකුණු කැලිෆෝනියා රග්බි සංගම්වල වසර 21ක පළපුරුද්දක් ඇති දෙවැනි මට්ටමේ විනිසුරුවරයෙකි.

ඔහු දැනට නවසීලන්තයේ ජාතික විනිසුරුවරයෙක් ද වේ.

සෑම් තොම්සන් යනු වසර 18කට වැඩි කාලයක් විනිසුරුවරයකු ලෙස කටයුතු කරන අයෙකි.

සෑම් දැනට ‘බේ ඔෆ් ප්ලෙන්ටි’ රග්බි සංගමයට අනුබද්ධව සිටී.

ෂෝන් කරව් ‘බේ ඔෆ් ප්ලෙන්ටි’ රග්බි සංගමය නියෝජනය කරමින් බේ ඔෆ් ප්ලෙන්ටි ප්‍රිමියර් ඩිවලොප්මන්ට් ෆයිනල් සහ ජාතික එන්පීසී ක්‍රීඩා සඳහා සහකාර විනිසුරුවරයකු ලෙස කටයුතු කර තිබේ.

ෂෝන් පළාත් ප්‍රිමියර් ක්‍රීඩා තරග පහක් විනිශ්චය කර ඇති අතර ඔහු වත්මන් ප්‍රධානියාගේ කලාප සංවර්ධන සංචිතයේ සාමාජිකයෙකි.

මෙම පුහුණු වැඩසටහන් පිළිබඳ අදහස් දක්වමින් ක්‍රිෂාන් අඹවත්ත පැවසුවේ තම දැක්ම සාක්ෂාත් කර ගැනීම සඳහා ශ්‍රී ලංකා රග්බි විනිසුරුවන් වෙත සම්බන්ධ වූ බවයි.

“ශ්‍රී ලංකා විනිසුරුවන් සඳහා කිසිදු වියදමකින් තොරව පුහුණු වැඩසටහනක් කරන්න මගේ සහාය ලබා දුන්නා. මෙම යෝජනාවට ශ්‍රී ලංකා රග්බි පාපන්දු විනිසුරුවන්ගේ සංගමය, ශ්‍රී ලංකා රග්බි සහ ක්‍රීඩා අමාත්‍යාංශයෙන් හොඳ පිළිගැනීමක් ලැබුණා” යනුවෙන් ඔහු පවසා තිබේ.

ශ්‍රී ලංකා රග්බි පාපන්දු විනිසුරුවන්ගේ සංගමයේ සභාපති ඩින්කා පීරිස්, විනිසුරු අනිල් ජයසිංහ, භාණ්ඩාගාරික මාධව විජේසිරි, ආසියානු රග්බි විනිසුරු ක්‍රීඩා කළමනාකරු ඩිල්රෝයි ප්‍රනාන්දු සහ ක්‍රීඩා අමාත්‍යාංශයේ අධ්‍යක්ෂ ජනරාල් ආචාර්ය ෂෙමාල් ප්‍රනාන්දුගේ උත්සාහය මත මෙය සංවිධාන කිරීමට හැකි වූ බව ද ක්‍රිෂාන් අඹවත්ත පැවසීය.