නවීන ආපදා පූර්ව අනතුරු ඇඟවීමේ පද්ධතියක් නිල වශයෙන් හඳුන්වා දී තිබේ.

විශේෂයෙන් සුනාමි ව්‍යසනයන් කෙරෙහි අවධානය යොමු කරමින්, අධි අවදානම් කලාප ලෙස හඳුනාගෙන ඇති දිස්ත්‍රික්ක 14ක ජංගම සහ ස්ථාවර දුරකථන අංක 60,000කට ආසන්න පද්ධතියක් මෙමගින් ඉලක්කකර ඇත.

එය සැලසුම් කර ඇත්තේ සයිරන් හඬක් සමඟින් සුවිශේෂී “Ring Tone” දැනුම්දීමක් ආකාරයෙන් ක්ෂණික පූර්ව අනතුරු ඇඟවීමක් නිකුත් කිරීමටය.

මෙම ආපදා පූර්ව අනතුරු ඇඟවීමේ පද්ධතිය ආපදා කළමනාකරණ මධ්‍යස්ථානය, ශ්‍රී ලංකා විදුලි සංදේශ නියාමන කොමිෂන් සභාව සහ SLT Mobitel, Hutch, Dialog සහ Airtel ඇතුළු ප්‍රධාන දුරකථන සේවා සපයන්නන්ගේ සහයෝගී උත්සාහයක ප්‍රතිඵලයකි.

එය ඊයේ නිල වශයෙන් ඇරඹුණේ ජනාධිපති රනිල් වික්‍රමසිංහගේ ප්‍රධානත්වයෙනි.

ජනාධිපති මාධ්‍ය අංශය පවසන පරිදි, මෙම උපායමාර්ගික මුලපිරීම විධිමත් කිරීමේ අවබෝධතා ගිවිසුමට ද ඊයේ ජනාධිපති කාර්යාලයේදී අත්සන් තැබිණි.

ආපදා කළමනාකරණ මධ්‍යස්ථානයේ අධ්‍යක්ෂ ජනරාල් මේජර් ජෙනරාල් එස්. රණසිංහ (විශ්‍රාමික) සහ ශ්‍රී ලංකා විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් මධුශංක දිසානායක අවබෝධතා ගිවිසුමට අත්සන් තැබූහ.

Dialog Axiataහි සමූහ ප්‍රධාන විධායක නිලධාරී සුපුන් වීරසිංහ, ශ්‍රී ලංකා ටෙලිකොම්හි සමූහ ප්‍රධාන විධායක නිලධාරී ජානක ආර්. අබේසිංහ, භාරතී එයාර්ටෙල් ලංකාහි ප්‍රධාන විධායක නිලධාරී අශිෂ් චන්ද්‍ර, මොබිටෙල් පෞද්ගලික සමාගමේ ප්‍රධාන මෙහෙයුම් නිලධාරී සුදර්ශන ගීගනගේ සහ Hutchison Telecommunications Lanka Pvtහි වැඩබලන ප්‍රධාන විධායක නිලධාරී සමිත්‍ර ගුප්තා ඇතුළු කැපී පෙනෙන පාර්ශවකරුවන් එම අවස්ථාවට ක්‍රියාකාරීව සම්බන්ධ වූහ.

මෙම අති නවීන ආපදා පූර්ව අනතුරු ඇඟවීමේ පද්ධතියේ මූලික අරමුණ වන්නේ කාලගුණික හා දේශගුණික විපර්යාස ඇතුළු විවිධ ව්‍යසන මධ්‍යයේ ශ්‍රී ලාංකික පුරවැසියන්ගේ ආරක්ෂාව සහ යහපැවැත්ම තහවුරු කරමින් පවතින යාන්ත්‍රණය ශක්තිමත් කිරීමයි.

දුරකථන සන්නිවේදන ජාල හරහා වඩාත් ඵලදායී පූර්ව අනතුරු ඇඟවීම් ලබාදීම සඳහා මෙම පද්ධතිය අති නවීන තාක්ෂණය උපයෝගී කරගනී.

එය සැලසුම්කර ඇත්තේ සයිරන් හඬක් සමඟින් සුවිශේෂී “Ring Tone” දැනුම්දීමක් ආකාරයෙන් ක්ෂණික පූර්ව අනතුරු ඇඟවීමක් නිකුත් කිරීමටය.

මෙය මහජනතාව සඳහා වඩාත් ශක්තිමත් පූර්ව අනතුරු ඇඟවීමේ යාන්ත්‍රණයක් ස්ථාපිත කරනු ඇති බවත් සයිරන් ශබ්දයක් සහිත දුරකථන දැනුම්දීම් භාවිත කිරීම විශේෂයෙන් රාත්‍රී කාලයේ දී ඵලදායී වනු ඇති බවටත් අපේක්ෂා කෙරේ.

“ජාතික ආරක්ෂක දිනය” යෙදී ඇති දෙසැම්බර් 26 වැනි දින මේ පිළිබඳ ජනතාව දැනුවත්කිරීමට සැලසුම් කර ඇති අතර, පද්ධතියේ විෂය පථය අනාගතයේ දී පුළුල් බහු විපත් පූර්ව අනතුරු ඇඟවීමේ යාන්ත්‍රණයක් බවට පරිණාමය වීමට අපේක්ෂා කෙරේ.

නායයෑම් සහ ගංවතුර වැනි ව්‍යසනයන්වලදී එහි උපයෝගීතාව සහ බලපෑම තවදුරටත් ඉහළයනු ඇතැයි ද අපේක්ෂා කෙරේ.