සමාජ සවිබල ගැන්වීම් පිළිබඳ රාජ්‍ය ඇමැති අනූප පැස්කුවල් අවධාරණය කර ඇත්තේ, ආබාධිත ප්‍රජාව සවිබල ගැන්වීම රටේ නිෂ්පාදන ආර්ථිකය නංවාලීම සඳහා අත්‍යවශ්‍ය බවයි.

සමස්ත ආබාධිත ප්‍රජාවගේ අයිතිවාසිකම් සුරක්ෂිත කිරීමේ අරමුණින් නව ආබාධිත පනත් කෙටුම්පතක් මේ වසරේ පාර්ලිමේන්තුවට ඉදිරිපත් කරන බව ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවක දී ඔහු ප්‍රකාශ කර ඇත.

රටේ ජනගහනයෙන් ආසන්න වශයෙන් 04% ක් ආබාධ සහිත පුද්ගලයන් වන අතර ඔවුන්ට මූල්‍ය ආධාර සහ අත්‍යාවශ්‍ය පහසුකම් ලබාදීමට රජය පියවර ගෙන ඇති බව රාජ්‍ය ඇමැතිවරයා පවසයි.

රටේ ආර්ථික වර්ධනයට අර්ථාන්විත දායකත්වයක් ලබා දීමට ඔවුන්ට හැකියාව ඇති බැවින්, මෙම ප්‍රජාව සවිබල ගැන්වීම සඳහා තාක්ෂණය උපයෝගී කර ගැනීමේ වැදගත්කම ද ඔහු අවධාරණය කර ඇත.

එහිදී වැඩිදුරටත් අදහස් දැක්වූ රාජ්‍ය ඇමැතිවරයා මෙසේද පැවැසීය.

මේ රටේ ජනගහණයෙන් 4%ක් පමණ වන ආබාධිත ප්‍රජාව වෙනුවෙන් මූල්‍ය ආධාර වගේම අනෙකුත් පහසුකම් ලබාදීමට ද රජය පියවර ගෙන තිබෙනවා. එමෙන්ම ඔවුන්ව නව තාක්ෂණයෙන් සවිබල ගැන්වීමට ද පියවර ගත යුතුයි. එමඟින් රටේ නිෂ්පාදන ආර්ථිකයට ඔවුන්ව දායක කර ගැනීමට හැකියාව තිබෙනවා.

ඒ වගේම ආබාධිත සහිත ප්‍රජාව ශක්තිමත් කිරීමට රජට විශේෂ අවධානයක් යොමු කර තිබෙනවා. ඒ අනුව ආබාධිත සහිත පුද්ගලයන්ගේ අයිතිවාසිකම් ආරක්ෂා කිරීම පිළිබඳ නව කෙටුම්පත මෙම වසර අවසන් වීමට පෙර පාර්ලිමේන්තුවෙදී සම්මත කර ගැනීමට අප බලාපොරොත්තු වෙනවා. ඔවුන් සැමදා රජයෙන් යැපෙන පිරිසක් බවට පත් නොවිය යුතුයි. එම නිසා ඔවුන් සමාජමය වශයෙන් සවිබල ගැන්වීමට අවශ්‍ය පියවර රජය විසින් ගනු ලබනවා.

ආබාධිත සහිත සියලු ප්‍රජාවට අධ්‍යාපනය මෙන්ම තාක්ෂණික දැනුම ලබාදීම අවශ්‍යයි. ඒ සඳහා අවශ්‍ය තාක්ෂණය සහ නව පාසල් පහසුකම් ලබාදීමටත් කටයුතු කළ යුතුයි. ආබාධිත කියා සමාජයෙන් වෙන් නොකර අනිකුත් ළමුන් සමඟ සම්බන්ධ කරගෙන මෙම වැඩසටහන ක්‍රියාත්මක කිරීමට බලාපොරොත්තු වෙනවා.

සංඥා භාෂා පනත ජාත්‍යන්තර වශයෙන් පිළිගන්නා භාෂාවක් බව කිවයුතුයි. එම නිසා සංඥා භාෂාව ඕනෑම කෙනෙකුට හඳුනාගත හැකි ආකාරයට මෙන්ම, අදහස් හුවමාරු කර ගැනීමේ සම්බන්ධතා ඇති කිරීමට ආබාධිත මහලේකම් කාර්යාලය හරහා සංඥා භාෂා පනත් කෙටුම්පත ද මෙම වසර අවසන් වීමට පෙර සංශෝධනය කිරීමට කටයුතු කරනවා.

ඒ වගේම මෙම වසර අවසානයේදී දෙස් විදෙස් ආබාධිත ප්‍රජාව ඒකරාශී කරගෙන ජාත්‍යන්තර මට්ටමේ සංචාරක වැඩසටහනක් පැවැත්වීමටත් සියලු කටයුතු සූදානම් කර තිබෙනවා.

ආබාධිත පනත් කෙටුම්පත මගින් රජයේ සහය මත යැපීම අවම කිරීම අරමුණු වන බව ඔහු පෙන්වා දී ඇත. මෙම වසර අවසන් වන විට පනත් කෙටුම්පත පාර්ලිමේන්තුවේ දී සම්මත වනු ඇතැයි අපේක්ෂා කළ හැකි බව ද ඔහු පවසයි.

මේ හරහා ආබාධිත සිසුන් වෙන් කිරීමට වඩා ඔවුන්ගේ සම වයසේ මිතුරන් සමඟ ඒකාබද්ධ කිරීමට රජය සැලසුම් කරයි.

සංඥා භාෂා පනත නීත්‍යානුකූල භාෂාවක් ලෙස ජාත්‍යන්තර පිළිගැනීමක් භුක්ති විඳින අතර එය විශ්වීය වශයෙන් අවබෝධ කර ගැනීමට ඉඩ සකස් කරමින් පවතින බව ද සදහන් වේ.

ශක්තිමත් සන්නිවේදන ක්‍රම පිහිටුවීමේ අරමුණින් ආබාධිත තැනැත්තන්ගේ මහලේකම් කාර්යාලය මගින් සිදු කරන සංඥා භාෂා පනත් කෙටුම්පත සංශෝධනය කිරීම මේ වසර අවසන් වන විට නිමාවට පත් කිරීමට ද නියමිත ව තිබේ.

ගෝලීය ආබාධිත ප්‍රජාව එක් කරමින් සැලකිය යුතු ජාත්‍යන්තර සංචාරක උළෙලක් මේ වසරේ දෙසැම්බර් මාසයේදී පැවැත්වීමට නියමිත බවත් එම වැඩසටහනේ කොටසක් ලෙස, කොළඹ සිට මහනුවර සංචාරක ගමනාන්ත වෙත සහභාගිවන්නන් ප්‍රවාහනය කිරීමට වෙන් කළ දුම්රිය සේවාවක් ක්‍රියාත්මක කිරීමට ද සැලසුම් කර ඇත.

අලංකාර අලුත්ගම වෙරළ තීරයේ විශේෂ සංස්කෘතික උත්සව සහ එක්දින වැඩමුළු කිහිපයක් පැවැත්වීමට ද අදහස් කර ඇත.

ආබාධිත ප්‍රජාව සවිබල ගැන්වීම කෙරෙහි ජනාධිපති රනිල් වික්‍රමසිංහ දැඩි අවධානයක් යොමු කර ඇති අතර, එමඟින් නිත්‍ය සමාජ සුබසාධන ප්‍රතිලාභවලට වඩා විවිධ දීමනා වැඩි දියුණු කිරීමට මග පාදනු ඇතැයි සැලකේ.

ආබාධිත සිසුන්ට ලබා දෙන අධ්‍යාපන ආධාර දීමනාව මීට පෙර රු. 10,000 වූ අතර මේ වසරේ සිට එය 20,000 දක්වා වැඩි කර තිබේ.