රුසියාවේ ශිෂ්‍ය වීසා ලබාදෙන බව පවසමින් රට පුරා සිටින පුද්ගලයන්ගෙන් රුපියල් මිලියන 50කට අධික මුදලක් වංචා කළ සැකකරුවකු බණ්ඩාරනායක අන්තර්ජාතික ගුවන් තොටුපළේ දී (BIA) ඊයේ රාත්‍රියේ අත්අඩංගුවට ගෙන තිබේ.

රුසියාවේ සිට පැමිණි අවස්ථාවේදී මීගමුව අපරාධ විමර්ශන කාර්යාංශයේ නිලධාරීන් විසින් ඔහු අත්අඩංගුවට ගෙන ඇත.

වත්තල, හුණුපිටිය ප්‍රදේශයේ පදිංචි 32 හැවිරිදි පුද්ගලයකු වන සැකකරු රුසියාවේ ශිෂ්‍ය වීසා ලබාදෙන බවට පොරොන්දු වෙමින් සංචාරක වීසා මත දිවයිනේ විවිධ ප්‍රදේශවල පුද්ගලයන් රුසියාවට යවා තිබේ.

රුපියල් මිලියන 2.15ක මුදලක් වංචා කළ බවට සැකකරුට එරෙහිව මීගමුව අපරාධ විමර්ශන කාර්යාංශයට පුද්ගලයකු කළ පැමිණිල්ලකට අනුව ඔහු අත්අඩංගුවට ගෙන ඇත.

සැකකරුට එරෙහිව මාතර පොලිසියට පැමිණිලි 17ක්, කුලියාපිටිය පොලිසියට පැමිණිලි 2ක්, කුරුණෑගල පොලිසියට පැමිණිලි 3ක් සහ නාරාහේන්පිට පොලිසියට එක් පැමිණිල්ලක් පමණ ලැබී ඇත.

වාද්දුව, අම්පාර සහ මොරටුව පොලිස් ස්ථානවලට ද පැමිණිලි ලැබී ඇත.