පාතාල කල්ලි නායක සංජීව කුමාර සමරරත්න හෙවත් ‘ගනේමුල්ල සංජීව’ ඝාතනය සම්බන්ධයෙන් පලාගිය සැකකාරිය වන ඉෂාරා සෙව්වන්දි සිටින ස්ථානය පිළිබඳ තොරතුරක් මත ශ්‍රී ලංකා පොලිසිය අනුරාධපුරයේ හෝටලයක වැටලීමක් සිදුකර තිබේ.

වැටලීම අතරතුර, සැකකාරියට සමාන කාන්තාවක් සතුව තිබී පොලිස් නිලධාරීන් විසින් මත්ද්‍රව්‍ය තොගයක් සොයාගෙන ඇත.

මේ අතර, ඝාතනයට සම්බන්ධ වීමෙන් පසු දැනට නිදැල්ලේ සිටින ඉෂාරා සෙව්වන්දි අත්අඩංගුවට ගැනීමට හේතුවන නිවැරදි තොරතුරු සපයන ඕනෑම අයකුට රුපියල් මිලියන 1.2ක මුදල් ත්‍යාගයක් ලබා දෙන බව පොලිස් මූලස්ථානය නිවේදනය කර ඇත.

කුප්‍රකට පාතාල කල්ලි නායක සංජීව කුමාර සමරරත්න 2025 පෙබරවාරි 19 වැනි දින අලුත්කඩේ අධිකරණ සංකීර්ණය තුළ අංක 05 මහේස්ත්‍රාත් අධිකරණයේදී වෙඩි තබා ඝාතනය කෙරිණි.

වෙඩි තැබීමේ සිද්ධියට ආධාර කිරීම සහ අනුබල දීම සම්බන්ධයෙන් චෝදනා ලැබ සිටින මෙම සැකකාරිය 25 හැවිරිදි කාන්තාවකි.

වෙඩි තැබීම සිදු වූ දින සිට ඇය සිටින ස්ථානය පිළිබඳ කිසිදු තොරතුරක් නොමැති බැවින්, ඇය අත්අඩංගුවට ගැනීමට හේතුවන ඕනෑම තොරතුරක් සඳහා රුපියල් මිලියන 1.2ක මුදල් ත්‍යාගයක් පිරිනැමීමට පොලිස් මූලස්ථානය තීරණය කර ඇති බව පොලිස් මාධ්‍ය අංශය නිකුත් කළ නිවේදනයක දැක්වේ.

තොරතුරු සැපයීමට දුරකථන අංක කිහිපයක් ද පහත පරිදි ලබා දී ඇත. තොරතුරු සපයන අයගේ රහස්‍යභාවය ආරක්ෂා කිරීමට ශ්‍රී ලංකා පොලිසිය පියවර ගන්නා බව ද දන්වා ඇත.

අධ්‍යක්ෂ, කොළඹ අපරාධ කොට්ඨාසය – 071-8591727

ස්ථාන භාර නිලධාරී, කොළඹ අපරාධ කොට්ඨාසය – 071-8591735