June 11, 2024
ශ්‍රී ලංකාව තුළ සිදු වූ විවාහයක් පිළිබඳ විදේශීය නියෝගයක් පිළිගෙන බලාත්මක කළ හැකි බවට කොළඹ දිසා අධිකරණය සුවිශේෂී තීන්දුවක් ප්‍රකාශයට පත්කර තිබේ.
ඒ අනුව, විවාහ නීතිවලට අදාළ අන්තර්ජාතික නීති ප්‍රමිතීන් ආරක්ෂා කරමින් කැලිෆෝනියාවේ වෙසෙන පැමිණිලිකරුවකුට පක්ෂව විවාහය විසුරුවා හැරීමේ නියෝගයක් කොළඹ දිසා අධිකරණය විසින් නිකුත් කරන ලදී.
කොළඹ දිසා අධිකරණ විනිසුරු ආර්.ඒ.එම්.රාජපක්ෂ පැමිණිලිකරුට පක්ෂව තනි තත්ත්ව සහතිකයක් ලබා ගැනීමට පහසුකම් සලසමින් මෙම තීන්දුව ලබා දුන්නේය.
ශ්‍රී ලංකාවේ නීත්‍යනුකූලව පිළිගත් විවාහයකට සම්බන්ධ ශ්‍රී ලාංකිකයන් දෙදෙනෙකු අතර මෙම නඩුව ක්‍රියාත්මක විය.
එක්සත් ජනපදයට ගිය පසු, ඔවුන් ඔවුන්ගේ විවාහය විසුරුවා හැරීමට සහ දික්කසාද නඩු කටයුතු ආරම්භ කිරීමට තීරණය කර තිබේ.
ෆීජිහිදී නැවත විවාහ වීම සඳහා තනිකඩ බවට ශ්‍රී ලංකාවෙන් සාක්ෂි අවශ්‍ය වී තිබීම පැමිණිලිකරුට බාධාවක් වී තිබිණි.
පැමිණිල්ල වෙනුවෙන් පෙනී සිටි ජ්‍යෙෂ්ඨ නීතීඥ ඉයන් ප්‍රනාන්දු අධිකරණයට දන්වා සිටියේ තම සේවාදායකයා මේ වන විටත් ඇමරිකාවේදී දික්කසාද වී ඇති බවත් ෆීජිහිදී දර්ශනීය විවාහ මංගල්‍යයක් පවත්වා නැවත විවාහ වීමට අපේක්ෂාවෙන් සිටින බවයි.
ඒ සඳහා පැමිණිලිකරුට ඔහුගේ උපන් රට වන ශ්‍රී ලංකාවෙන් තනිකඩ බවට සාක්ෂියක් අවශ්‍ය බව ෆීජි රජය දන්වා ඇත.
ඒ අනුව අමෙරිකා එක්සත් ජනපදයේදී නිකුත් කර ඇති දික්කසාද ආඥාව පිළිගෙන බලාත්මක කරන ලෙස අධිකරණයෙන් ඉල්ලා පැමිණිලිකරු ශ්‍රී ලංකා නීති පද්ධතිය හරහා නියෝගයක් ඉල්ලා සිටියේය.
ෆීජි හි නැවත විවාහ වීම සඳහා තනිකඩ බව සනාථ කරන සහතිකයක් ලබා ගැනීමටත් ශ්‍රී ලංකාවේ දැනට පවතින විවාහ සහතිකය අවලංගු කිරීමටත් පැමිණිලිකරුට අවශ්‍ය වී තිබේ.
ජ්‍යෙෂ්ඨ නීතීඥ ඉයන් ප්‍රනාන්දු, නීතිඥ දිනූෂා අමරසිංහ සහ හසිත් ලියනගේ යන පිරිසගේ උපදෙස් මත පැමිණිලිකරු වෙනුවෙන් පෙනී සිටින ඩෙරික් ප්‍රනාන්දු අධිකරණයට කරුණු ඉදිරිපත් කළේ ජීවන සැලසුම් ඉදිරියට ගෙනයෑමට සහ ශ්‍රී ලංකාවේ දික්කසාදය ලබා ගැනීමටතනිකඩ බවට වන සහතිකයේ වැදගත්කමයි.
දික්කසාද නඩුවේ අමෙරිකානු තීන්දුව දැනටමත් ලබාගෙන ඇත.
අභියාචනාධිකරණය සිය මෑත තීන්දුවේ (CA/WRIT/266/2021) වෙනත් රටක නිසි අධිකරණයක් විසින් නිකුත් කරන ලද විවාහයක් විසුරුවා හැරීම සනාථ කරන වලංගු ලියවිල්ලක් පිළිගැනීමට ශ්‍රී ලංකාවේ දිස්ත්‍රික් අධිකරණයකට බාධාවක් නැති බවට තීන්දු කර තිබිණි.
කෙසේවෙතත්, අභියාචනාධිකරණය විසින් මෙම පිළිගැනීම අධිකරණය විසින් නියම කර ඇති මාර්ගෝපදේශවලට සහ සාක්ෂි සම්බන්ධයෙන් නීතියේ විධිවිධානවලට යටත් විය යුතු බව තීරණය කළේය.
පළමු මාර්ගෝපදේශය වන්නේ එවැනි රටක නීතිය මගින් විදේශීය භූමියක සිදු කරන විවාහයන් විසුරුවා හැරීමේ අධිකරණ බලය අදාළ අධිකරණයට පවරා තිබේද යන්න සොයා බැලීමයි.
දෙවනුව, ශ්‍රී ලංකාවේ විවාහ ගිවිසුමට එළැඹි දෙපාර්ශ්වයම දික්කසාදයක් සඳහා අයදුම් කිරීමේදී සාධාරණ කාලයක් අදාළ රටේ පදිංචිව සිටීම අත්‍යවශ්‍ය බවයි.
තෙවනුව, විවාහක ක්‍රියාවන් සම්බන්ධයෙන් එවැනි අධිකරණයක අනුගමනය කරන ක්‍රියා පටිපාටියට යටත් වන අතරම, ස්වාමිපුරුෂයා සහ භාර්යාව යන දෙදෙනාම විදේශීය අධිකරණයක එවැනි දික්කසාද නඩු කටයුතු සඳහා ක්‍රියාකාරීව සහභාගී විය යුතු බවයි.
