දැනටමත් ආනයනය කර ඇති පිළිකා ඖෂධ වර්ග 28 කට ආසන්න සංඛ්‍යාවක් මුදල් අමාත්‍යංශයේ ලිපි ලේඛන ප්‍රමාද වීම හේතුවෙන් රෝහල් වෙත බෙදා හැරීමට බලා සිටින බව වෛද්‍ය සැපයුම් අංශයේ නියෝජ්‍ය අධ්‍යක්ෂ ජනරාල් වෛද්‍ය ජී. විජේසූරිය පවසයි.

“පිළිකා ඖෂධවල යම් ප්‍රමාණයක හිඟයක් තිබෙනවා. මේ වන විට පිළිකා ඖෂධ වර්ග 28ක් ආනයනය කර ඇති අතර ඒවා ලැබෙනතුරු වෛද්‍ය සැපයුම් අංශය බලා සිටිනවා,” යැයි ඔහු පැවසීය.

“කෙසේවෙතත් ලියකියවිලි ප්‍රමාදයක් හේතුවෙන් අදාළ ඖෂධ බෙදා හැරීම අත්හිටුවා තිබෙනවා. මෙම ඖෂධ ඉන්දියානු ණය මාර්ගයක් හරහා ගෙනැවිත් තිබෙන නිසා බෙදා හැරීම ආරම්භ කිරීමට මුදල් අමාත්‍යංශයේ සමහර ලියකියවිලි අවශ්‍යයි. මෙම පිළිකා ඖෂධ වර්ග 28 අපට ලැබුණු පසු පොරොන්දු වූ ලියකියවිලි ලබා දෙන්නේ නම් සඳුදා හෝ අඟහරුවාදා වන විට එම ඖෂධ රෝහල්වලට බෙදා හැරීමට හැකිවනු ඇතැයි මා විශ්වාස කරනවා.” යනුවෙන් ද ඔහු පැවසීය.

වෛද්‍ය විජේසූරිය කියා සිටියේ වර්තමානයේ ඖෂධ ගෙන්වීම සහ බෙදාහැරීම සම්බන්ධයෙන් විවිධ පුද්ගලයන් විවිධ චෝදනා එල්ල කරන බැවින් ඉතා කල්පනාකාරී විය යුතු බවයි.

“මෙවැනි චෝදනා වළක්වා ගැනීම සඳහා අපට ක්‍රියාමාර්ග ගත හැක්කේ ඉතා ප්‍රවේශමෙන් සහ වගකීමෙන් යුතුව සියලු අංශ පරීක්ෂා කිරීමෙන් පසුව පමණයි. ඒ නිසා ක්‍රියාවලියේ යම් ප්‍රමාදයක් තියෙනවා.” යැයි ඔහු පැහැදිලි කළේය.

“විවිධ පුද්ගලයන් තම පෞද්ගලික ලාභ ප්‍රයෝජන තකා විවිධ ආකාරයේ චෝදනා එල්ල කරනවා, එක් අංශයක වරදක් ඇත්නම් ඔවුන් අතිශයෝක්තියෙන් ප්‍රකාශ නිකුත් කරනවා. එම නිසා අපි ක්‍රියාවලිය දැඩි ලෙස පරීක්ෂා කරමින් ඖෂධ බෙදා හැරීම සිදු කරනු ලබන්නේ සෑම ලේඛනයක්ම තහවුරු කිරීමෙන් පසුව පමණයි. මේ නිසා ඖෂධ නිකුත් කිරීමේ ප්‍රමාදයක් තිබෙනවා.” යැයි ඔහු සඳහන් කළේය.

ඖෂධ නිකුත් කිරීම සම්බන්ධ ඇතැම් නිලධාරිවාදී කරුණු ද නිවැරදි කළ පසු පිළිකා ඖෂධ හිඟය සඳුදා (29) වන විට විසඳෙනු ඇතැයි වෛද්‍ය විජේසූරිය පැවසීය.

එසේම, රාජ්‍ය ඖෂධ නීතිගත සංස්ථාවේ සාමාන්‍යාධිකාරී දිනූෂා දසනායක ද අදහස් දක්වමින් තහවුරු කර සිටියේ පිළිකා ඖෂධ හිඟය සඳුදා වන විට විසඳනු ඇති බවයි.

“වෛද්‍ය සැපයුම් අංශයේ සමහර ඖෂධ හිඟයක් පවතින නමුත් සඳුදා වන විට මෙම තත්ත්වය නිවැරදි වනු ඇති. සමහර ඖෂධ දැනටමත් ලැබී තිබෙනවා; වෛද්‍ය සැපයුම් අංශයට මේවා ලැබීමේ කුඩා ප්‍රමාදයක් සිදුවී තිබෙනවා. මෙය දැන් නිරාකරණය කර තිබෙන නිසා සඳුදා වන විට ඖෂධ තොග ලබා ගැනීමට හැකි වනු ඇති.” යැයි ඔහු සඳහන් කළේය.

මීට අමතරව, ජාතික පිළිකා ආයතනයේ (අපේක්‍ෂා රෝහලේ) අධ්‍යක්ෂ වෛද්‍ය අරුණ ජයසේකර පැවසුවේ, මීට මාස කිහිපයකට පෙර පිළිකා ඖෂධ හිඟය කැපී පෙනෙන තත්ත්වයක පැවතිය ද මේ වන විට එම හිඟය බරපතළ ලෙස අඩු වී ඇති බවයි.

“පෙර මෙන් පිළිකා ඖෂධවල සැළකිව යුතු හිඟයක් නැහැ; මීට පෙර ඖෂධ 15ක පමණ හිඟයක් පැවති නමුත් දැන් ඖෂධ 6ක හිඟයක් පමණයි තිබෙන්නේ” යැයි ඔහු ප්‍රකාශ කළේය.(The Morning)