කටාර් රාජ්‍යයේ සේවය කළ ගෘහ සේවිකාවක් නැවත මෙරටට පැමිණෙමින් සිටියදී ගුවන් යානය තුළම මියගොස් ඇතැයි වාර්තා වේ.

ඒ අනුව එරට සිය සේවා කාළය නිමා කර මෙරටට පැමිණෙමින් සිටියදී ගුවන් යානය තුළම මෙසේ මිය ගොස් ඇතැයි කටුනායක ගුවන් තොටුපොළ පොලිසිය සඳහන් කරයි.

ඇය මොරටුව, කොරළවැල්ල ප්‍රදේශයේ පදිංචි ගුරුගේ ප්‍රියංගිකා දිල්හානි ප්‍රනාන්දු නැමැති 40 හැවිරිදි අවිවාහක කාන්තාවකි .

අදාළ කාන්තාව ඊයේ (23) අලු‍යම 01.17ට දෝහා සිට කටාර් ගුවන් සේවයේ ගුවන් යානයකින් කටුනායක ගුවන් තොටුපොළ වෙත පැමිණ ඇති අතර, එම ගුවන් යානය මෙරටට පැමිණෙමින් තිබියදී මෙම මරණය සිදුව තිබේ.

පසුව ඇයගේ මළසිරුර මීගමුව මහරෝහලේ මෘත ශරීරාගාරය වෙත යොමුකර ඇත.

මේ පිළිබඳ වැඩිදුර විමර්ශන කටයුතු කටුනායක ගුවන්තොටුපොළ පොලිසිය සිදුකරයි.