දැනට පවතින අධිකරණ අතුරු නියෝගය ඉවත් කළහොත් අත්‍යවශ්‍ය ඖෂධ සඳහා උපරිම සිල්ලර මිලක් හඳුන්වා දීමට ජාතික ඖෂධ නියාමන අධිකාරිය සූදානම් බව වාර්තා වේ.

ජාතික ඖෂධ නියාමන අධිකාරියේ සභාපති වෛද්‍ය ආනන්ද විජේවික්‍රම පවසන්නේ ඖෂධ මිල අඩු කිරීම සම්බන්ධයෙන් අඛණ්ඩව සාකච්ඡා පැවැත්වෙන බවයි.

ශ්‍රී ලංකා ඖෂධ කර්මාන්ත මණ්ඩලය විසින් පවරා ඇති නඩුවේ අතුරු නියෝගය හේතුවෙන් මිල අඩු කිරීම වැළකී ඇති බවත් එම වාරණ නියෝගය ඉවත් කිරීමට නියෝගයක් ලබා ගැනීමටත් ජාතික ඖෂධ නියාමන අධිකාරිය සැලසුම් කර තිබේ.

එක්සත් ජනපද ඩොලරයේ අගය පහළයෑම සැළකිල්ලට ගනිමින් 2023 ජූනි මාසයේදී ඖෂධ සඳහා අවසන් මිල සංශෝධනය සිදු කර තිබිණි.

එහිදී ඖෂධ 60ක උපරිම සිල්ලර මිල 16%කින් අඩු කිරීමට සහ සෑම මාස තුනකට වරක් ඖෂධ මිල සමාලෝචනය කිරීමට කැබිනට් මණ්ඩලය විසින් යෝජනාවක් අනුමත කරන ලදී.

විනිමය අනුපාතික වෙනස්වීම් හේතුවෙන් 2021 වසරේ සිට අවස්ථා තුනකදී පිළිවෙළින් 9%, 29% සහ 40%කින් ලෙස ඖෂධ මිල ඉහළ යෑමෙන් පසුව මෙම අඩු කිරීම සිදු විය.

මෙම වැඩිවීම් මෙරට සෞඛ්‍ය ක්ෂේත්‍රයට දැඩි ලෙස බලපෑ අතර බොහෝ දෙනෙකුට අවශ්‍ය ඖෂධ ලබා ගැනීමට නොහැකි විය.