February 2, 2025
කොළඹ වරායේ බහාලුම් ප්‍රවාහන රථ තදබදයට විසඳුමක් ගෙන ඒමට අඛණ්ඩව ප්‍රමාද වීම සම්බන්ධයෙන් සොයාබැලීමට මුදල් අමාත්‍යාංශය කමිටුවක් පත්කර තිබේ.
සති දෙකකට වැඩි කාලයක් වරායේ ගොඩගැසුණු බහාලුම් ඉවත් නොකිරීම සඳහා සිතාමතා කඩාකප්පල්කාරී ක්‍රියාවක් සිදුවී ඇත්ද යන්න කමිටුව විසින් සොයාබැලීමට නියමිතයි.
ආනයනික බහාලුම් 323ක් රේගු පරීක්‍ෂණයට ලක්නොකර නිෂ්කාශනය කිරීම සම්බන්ධයෙන් මතුව ඇති ආන්දෝලනාත්මක තත්ත්වය පිළිබඳව ද මෙහිදී විමර්ශනය කෙරෙනු ඇති.
මෙම කමිටුවේ ප්‍රධානත්වය දරනු ලබන්නේ නියෝජ්‍ය භාණ්ඩාගාර ලේකම් ඒ.කේ. සෙනෙවිරත්න ය.
එහි සෙසු සාමාජිකයන් වන්නේ ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍යාංශයේ අතිරේක ලේකම් ඊ.එම්.එස්.බී. ජයසුන්දර, වෙළෙඳ හා ආයෝජන ප්‍රතිපත්ති දෙපාර්තමේන්තුවේ අධ්‍යක්ෂ ජනරාල් එම්.කේ.පී. කුමාර, කළමනාකරණ විගණන දෙපාර්තමේන්තුවේ අධ්‍යක්ෂ ජනරාල් ඒ.පී.කුරුම්බලපිටිය සහ ජ්‍යෙෂ්ඨ රේගු අධ්‍යක්ෂ සපුමල් ජයසුන්දර ඇතුළු පිරිසකි.
වෙළඳ හා ආයෝජන ප්‍රතිපත්ති දෙපාර්තමේන්තුවේ අධ්‍යක්ෂ ආචාර්ය විශාකා ඇලපාත කමිටුවේ ලේකම් සහ කැඳවුම්කරු ලෙස කටයුතු කරනු ඇත.
රේගු අධ්‍යක්ෂ ජනරාල්වරයා ඉවත් කරන ලෙසට ඇතැම් වෘත්තීය සමිති බලපෑම් කරමින් සිටින බවත්, වරායෙන් බහාලුම් ඉවත් කිරීමේ ගැටළුව එම උත්සාහයේ කොටසක් විය හැකි බවටත් සැක මතුව ඇත.
රේගුව විසින් මෑතකදී අභ්‍යන්තර දූෂණ මර්දන ඒකකයක් ද පිහිටුවා තිබූ අතර, රේගුව තුළ සිදුවන අභ්‍යන්තර දූෂණ පිළිබඳව පැමිණිලි කිරීම සඳහා ජනතාව වෙනුවෙන් එය පිහිටුවා තිබේ.
රේගු නිලධාරීන් 4 දෙනෙකු දූෂිත ක්‍රියාවල නිරතව සිටියදී දැනටමත් මෙම ඒකකය මගින් අනාවරණය කරගෙන ඇති අතර, ඉන් පසු ඔවුන්ගේ වැඩ තහනම් කර ඇත.
එබැවින් රේගු නිලධාරීන් දූෂිත ක්‍රියාකාරකම්වල නියැලීමට වැඩි බියක් දක්වන බව වාර්තා වේ.
කොළඹ වරායේ බහාලුම් ප්‍රශ්නය සම්බන්ධයෙන් අදහස් දක්වමින් ආරංචි මාර්ග සඳහන් කරන්නේ, වරායේ බහාලුම් පරීක්ෂා කිරීමේ වේගය 50%කින් පමණ සැකකිය යුතු ලෙස අඩු කිරීමට ඇතැම් රේගු වෘත්තීය සමිති කටයුතු කරන බවයි.
