හූති කැරලිකරුවන් යේමනයේ වෙරළට ඔබ්බෙන් එක්සත් ජනපදයට අයත් භාණ්ඩ ප්‍රවාහන නෞකාවකට බැලස්ටික් මිසයිල (ballistic missile) ප්‍රහාරයක් එල්ල කළ බව එක්සත් ජනපදය පවසයි.

හමාස් සංවිධානයට එරෙහි ඊශ්‍රායලයේ යුද්ධයට විරෝධය පළ කරමින් ඉරානයේ හූතිවරු පසුගිය නොවැම්බර් මාසයේ සිට නැව්වලට ප්‍රහාර එල්ල කරන බවට තර්ජනය කර තිබිණි.

වානේ නිෂ්පාදන රැගෙන යමින් සිටි ජිබ්‍රෝල්ටාර් ඊගල් (Gibraltar Eagle) නෞකාවට මෙම ප්‍රහාරය එල්ල කර තිබේ.

එසේම, රතු මුහුදේදී එක්සත් ජනපද නෞකාවක් දෙසට එල්ල කරන ලද තවත් මිසයිලයක් එක්සත් ජනපද ප්‍රහාරක ජෙට් යානයක් විසින් බිම හෙළූ බව එක්සත් ජනපදයේ Centcom (U.S. Central Command) වාර්තා කරයි.

ඒ අනුව, නැව් ගමනාගමනයට එල්ල කළ ප්‍රහාරවලට, යේමනයේ හූතින් ඉලක්ක කර ගනිමින් පසුගිය සතියේ එක්සත් ජනපදය විසින් ප්‍රතිප්‍රහාර එල්ල කරන ලදී.

එක්සත් රාජධානියේ අගමැති රිෂි සුනක් කියා සිටියේ, හූතින්ට අයත් ස්ථාන 13ක් හමුදාව විසින් විනාශ කළ බවයි.

එසේම, හූතිවරුන්ගේ හමුදා මධ්‍යස්ථාන වෙත එල්ල කළ එක්සත් ජනපදයේ හමුදා ගුවන් ප්‍රහාර හේතුවෙන්, ඔවුන්ගේ අවි ගබඩාවෙන් හතරෙන් එකක් විනාශ වී ඇති බව එක්සත් ජනපද බුද්ධි අංශ තක්සේරු කරයි.

රතු මුහුදේ භාණ්ඩ ප්‍රවාහනය කරන නැව්වලට හූති ප්‍රහාර එල්ල කිරීම නිසා ලොව විශාලතම නැව් සමාගම් බොහොමයක් ගමන් මාර්ග වෙනස් කර ඇති අතර, එමඟින් ගෝලීය වාණිජ්‍යයට විශාල බාධාවක් ඇති වී තිබේ.

ඉරාන විදේශ අමාත්‍ය Hossein Amir-Abdullahian පසුගිය සඳුදා පැවැති මාධ්‍ය හමුවකදී කියා සිටියේ, බටහිර රටවල් යේමනයට එරෙහි යුද්ධය වහාම නතර කළ යුතු බවයි.