පසුගිය ඉරිදා(18) ටයිටැනික් නෞකාවේ සුන්බුන් වෙත කිමිදීමේදී සංචාරක නිරතවූ සබ්මැරීනයක් අතුරුදහන්වීමෙන් පසු අත්ලාන්තික් සාගරයේ දැවැන්ත සෙවීම් සහ ගලවා ගැනීමේ මෙහෙයුමක් ක්‍රියාත්මක කර ඇත.

සබ්මැරීනය අයත් සංචාරක සමාගමක් වන OceanGate පවසා ඇත්තේ සබ්මැරීනයේ සිටින පුද්ගලයන් පස් දෙනා බේරාගැනීම සඳහා සියලු හැකියාවන් ගවේෂණය කරමින් සිටින බවයි.

සාගරයේ කිමිදීමෙන් පැය එකයි මිනිත්තු 45කින් පමණ කුඩා සබ්මැරීනය සමඟ ඇති සම්බන්ධය නැති වූ බව එක්සත් ජනපද වෙරළාරක්ෂක බලකාය පවසයි.

සාගරයේ මීටර් 3,800 (අඩි 12,500) ගැඹුරකින් පවතින ටයිටැනික් නෞකාවේ සුන්බුන් වෙත කිමිදීම ඇතුළුව දින අටක සංචාරයක් සඳහා සබ්මැරීනයේ ප්‍රවේශපත්‍රවල මිල ඩොලර් 250,000ක් (පවුම් 195,000) වේ.

රජයේ ආයතන, එක්සත් ජනපද සහ කැනේඩියානු නාවික හමුදා සහ ගැඹුරු මුහුදේ කටයුතුවල ක්‍රියාත්මක වාණිජ සමාගම් ගලවා ගැනීමේ මෙහෙයුමට උපකාර කරන බව නිලධාරීහු පවසති.