කොච්චිකඩේ ශාන්ත අන්තෝනි දේවස්ථානයේ පාස්කු ඉරිදා දේව මෙහෙය අතරතුර සැකපිට අත්අඩංගුවට ගත් කාන්තාවක් සහ පිරිමි පුද්ගලයෙකු නිදහස් කිරීමට කොළඹ මහේස්ත්‍රාත් අධිකරණය නියෝග කර තිබේ.

වෙරළබඩ පොලිසිය විසින් සැකකරුවන් අධිකරණයට ඉදිරිපත් කර තිබිණි.

පොලිසිය අධිකරණය හමුවේ පවසා ඇත්තේ, ඉකුත් ඉරිදා දින සැකකරුවන් දේවස්ථාන භූමියට යාබදව සැකසහිත ලෙස ගමන් කරන ආකාරය නිරීක්ෂණය කිරීමෙන් පසු ආරක්ෂක අංශ විසින් අත්අඩංගුවට ගෙන ඇති බවයි.

එමෙන්ම අධිකරණයට පොලිසිය ප්‍රකාශ කළේ, ඉන් පසුව ඔවුන්ට එරෙහිව කිසිදු චෝදනාවක් සොයානොගත් බවත්, එම නිසා අත්අඩංගුවට ගත් පුද්ගලයන්ට එරෙහිව ඉදිරි නීතිමය ක්‍රියාමාර්ග නොගන්නා බවයි.

ඊට අදාළව අතිරේක නියෝග අවශ්‍ය නොවන බවද පොලිසිය අධිකරණයට දන්වා ඇත.

ඒ අනුව අදාළ පිරිමි පුද්ගලයා සහ කාන්තාව වහාම නිදහස් කරන ලෙස අධිකරණය නියෝග කර තිබේ.