දක්ෂිණ අධිවේගී මාර්ගයට අදාළ ගෙවීම් ගැටලුවක් සම්බන්ධයෙන් මාර්ග සංවර්ධන අධිකාරිය සහ චීන වරාය ඉංජිනේරු සංස්ථාව (CHEC) අතර නව ආරවුලක් මතුව ඇති බවත් එම නිසා බලධාරීන් නීතිපති දෙපාර්තමේන්තුවේ නියෝගවලට අනුව කටයුතු කිරීමට නියමිත බවත් වාර්තා වේ.

2011 දී විවෘත කරන ලද අධිවේගී මාර්ගයේ කොට්ටාව-දොඩන්ගොඩ කොටසේ ඉදිකිරීම් සඳහා රුපියල් බිලියන 7.91ක් තවමත් ගෙවා නොමැති බව පවසමින් චීන වරාය ඉංජිනේරු සංස්ථාව මෑතකදී මාර්ග සංවර්ධන අධිකාරියට ඉල්ලීම් ලිපියක් යවා ඇති බව මාධ්‍ය වාර්තා කර තිබිණි.

එම වාර්තාවලට අනුව, මාර්තු 31 වැනි දිනට පෙර ගෙවීම සිදු කරන ලෙස සමාගම ඉල්ලා ඇත.

කෙසේවෙතත්, මාර්ග සංවර්ධන අධිකාරිය එම ප්‍රකාශය ප්‍රතික්ෂේප කර ඇත්තේ කිසිදු මුදලක් ගෙවිය යුතු නැති බව පවසමිනි.

මෙම කාරණය දැන් බරපතළ අතට හැරී ඇත්තේ මෙම දිගු කාලීන මත ගැටුම සම්බන්ධයෙන් ජනාධිපති අනුර කුමාර දිසානායකගෙන් අපරාධ පරීක්ෂණයක් ඉල්ලා සිටීමට මාර්ග සංවර්ධන අධිකාරිය සැලසුම් කර ඇති බැවිනි.

නීතිපති දෙපාර්තමේන්තුවේ නියෝගවලට අනුකූලව පියවර ගනිමින් සිටින බව ප්‍රවාහන, මහාමාර්ග, වරාය සහ ගුවන් සේවා අමාත්‍යාංශයේ අභ්‍යන්තර ආරංචි මාර්ගවලින් වාර්තා වේ.

මේ අතර, මාර්ග සංවර්ධන අධිකාරියේ අධ්‍යක්ෂ ජනරාල් එස්. එම්. පී. සූරියබණ්ඩාර නව එන්තරවාසියක් ලැබී ඇති බව තහවුරු කළේය.

මෙම කාරණය දැනට විදේශගතව සිටින මාර්ග සංවර්ධන අධිකාරියේ සභාපති ටී. පාස්කරන් විසින් හසුරුවන බව පවසමින් ඔහු තවදුරටත් අදහස් දැක්වීමෙන් වැළකී සිටියේය.

2024 දී, ජනාධිපතිවරණයට සති කිහිපයකට පෙර, එවක ජනාධිපති රනිල් වික්‍රමසිංහගේ නායකත්වයෙන් යුත් කැබිනට් මණ්ඩලය චීන වරාය ඉංජිනේරු සමාගමට ගෙවීමක් කඩිනමින් අනුමත කර තිබිණි.

දින එකොළහකට පසු, චීන සමාගම සහ එවක මහාමාර්ග අමාත්‍යාංශයේ ලේකම් රංජිත් රූබසිංහ අවසන් විසඳුමකට එළැඹ තිබිණි.