2023 වසරේ දී ශ්‍රී ලංකාව විසින් මාතෘ මරණ සංඛ්‍යාව සජීවී දරු උපත් 100,000කට 25ක් දක්වා අඩු කර ගැනීමෙන් කැපී පෙනෙන ප්‍රගතියක් ලබා ඇති බව ලෝක සෞඛ්‍ය සංවිධානය පවසයි.

කෙසේවෙතත්, මෑත කාලීන අධ්‍යයනවලින් අඩු බර දරු උපත් වැඩිවීමක් ද පෙන්නුම් කර ඇති නිසා ඊට හේතු සහ මාතෘ පෝෂණයේ කාර්යභාරය පරීක්ෂා කිරීමේ හදිසි අවශ්‍යතාව ලෝක සෞඛ්‍ය සංවිධානය ඉස්මතු කර තිබේ.

අප්‍රේල් 07 වැනි දිනට යෙදෙන ලෝක සෞඛ්‍ය දිනය සනිටුහන් කරමින්, ලෝක සෞඛ්‍ය සංවිධානය 2025 සඳහා මාතෘ සහ අලුත උපන් සෞඛ්‍යය පිළිබඳ වසරක ව්‍යාපාරයක් ආරම්භ කළේ ‘සෞඛ්‍ය සම්පන්න ආරම්භයන්, බලාපොරොත්තු සහගත අනාගතයක්’ යන මාතෘකාව යටතේය.

වළක්වා ගත හැකි මාතෘ සහ බිළිඳු මරණ සඳහා වන උත්සාහයන් ඉහළ නැංවීමට සහ කාන්තාවන්ගේ දිගුකාලීන සෞඛ්‍ය සහ යහපැවැත්මට ප්‍රමුඛත්වය දීමට රජයන් සහ සෞඛ්‍ය ප්‍රජාවන්ගෙන් ඉල්ලා සිටීම කෙරෙහි මෙම ව්‍යාපාරය අවධානය යොමු කරයි.

ලෝක සෞඛ්‍ය සංවිධානය ප්‍රකාශ කළේ ගර්භණීභාවය සහ දරු ප්‍රසූතියේ සංකූලතා හේතුවෙන් වාර්ෂික මාතෘ මරණ 300,000කට ආසන්න සංඛ්‍යාවක් සිදුවන බවයි.

2000 වසරේ සිට මාතෘ මරණ 40%කින් අඩු කිරීමට හේතු වී ඇතත්, ඇතැම් කලාපවල මාතෘ මරණ අනුපාතය ඉහළ මට්ටමක පවතී.

2023 දී ගෝලීය මාතෘ මරණවලින් ආසන්න වශයෙන් 70%ක් උප සහරා අප්‍රිකාවෙන් සටහන් වී ඇති අතර, මධ්‍යම සහ දකුණු ආසියාවෙන් 17%ක ප්‍රමාණයක් සටහන් වී තිබේ.

සෞඛ්‍ය අමාත්‍යාංශය සමඟ සහයෝගයෙන් අන්තර්ජාලය ඔස්සේ පවත්වන ලද දේශන මාලාවකදී, 2023 දී සජීවී දරු උපත් 100,000කට 25 දක්වා මාතෘ මරණ අඩු කර ගැනීම සම්බන්ධයෙන් ශ්‍රී ලංකාවේ ප්‍රගතිය ලෝක සෞඛ්‍ය සංවිධානය විසින් ඉස්මතු කරන ලදී.

මෙම ජයග්‍රහණයට හේතු වී ඇත්තේ ශ්‍රී ලංකාවේ නිදහස් සෞඛ්‍ය සේවා, වෘත්තීය වින්නඹු සේවය, දත්ත මත පදනම් වූ තීරණ ගැනීම සහ අඛණ්ඩ ගුණාත්මකභාවය වැඩිදියුණු කිරීම සඳහා ඇති කැපවීමයි.

ශ්‍රී ලංකාවේ ධනාත්මක ප්‍රගතිය පිළිගන්නා අතරම ලෝක සෞඛ්‍ය සංවිධානය රජයෙන් ඉල්ලා සිටින්නේ ආර්ථික පසුබෑම් සහ ඉහළ යන දරිද්‍රතාව මගින් මතු වන ගැටලු ද පිළිගෙන, මාතෘ පෝෂණය ආරක්ෂා කිරීම සඳහා සාක්ෂි මත පදනම් වූ මැදිහත්වීම් සහ ප්‍රතිපත්ති වැඩි වැඩියෙන් ක්‍රියාත්මක කරන ලෙසයි.

මාතෘ පෝෂණය සෞඛ්‍යයට සහ සංවර්ධනයට දිගුකාලීන බලපෑම් ඇති කරන බව ලෝක සෞඛ්‍ය සංවිධානය අවධාරණය කළේය.

ශ්‍රී ලංකාවේ මාතෘ පෝෂණය පිළිබඳ පෙන්වා දෙමින් රටේ අඛණ්ඩ ආර්ථික පසුබෑම අභියෝග ඇති කරන බවත්, එය ගැබිනි මව්වරුන් සඳහා පෝෂ්‍යදායී ආහාර සහ සෞඛ්‍ය සේවා සඳහා ප්‍රවේශයට බලපෑම් කළ හැකි බවත් ලෝක සෞඛ්‍ය සංවිධානය අවධාරණය කළේය.

ශ්‍රී ලංකාවේ මාතෘ සෞඛ්‍ය ඉලක්ක සපුරා ගැනීම සඳහා ලෝක සෞඛ්‍ය සංවිධානයේ සහයෝගය ප්‍රකාශ කරමින් ප්‍රතිඵල තවදුරටත් වැඩිදියුණු කිරීම සඳහා ප්‍රසව හා පසු ප්‍රසව සේවා වැඩිදියුණු කිරීම, සෞඛ්‍ය සේවා ප්‍රවේශ විෂමතා ආමන්ත්‍රණය කිරීම සහ උසස් වෛද්‍ය මැදිහත්වීම් ඒකාබද්ධ කිරීම අත්‍යවශ්‍ය වනු ඇති බව එම සංවිධානය අවධාරණය කළේය.