April 2, 2025
අප්‍රේල් 1 වැනි දින සිට ක්‍රියාත්මක වන පරිදි සියලුම මෘදු හා සැර මත්පැන් බෝතල් සහ කෑන් මත ස්ප්‍රීතු නිෂ්පාදන දිනය මුද්‍රණය කරන ලෙස
සුරාබදු දෙපාර්තමේන්තුව මෙරට මත්පැන් නිෂ්පාදන සමාගම් 26ටම ඊයේ නියෝග කර තිබේ.
සියලුම බලපත්‍රලාභී මත්පැන් අලෙවිකරුවන්ට පසුගිය සිකුරාදා විශේෂ චක්‍රලේඛයක් යවමින් සුරාබදු කොමසාරිස් ජනරාල්වරයා දැනුම් දී ඇත්තේ සියලුම මත්පැන් නිෂ්පාදකයන්ට ඔවුන්ගේ නිෂ්පාදන දිනය බෝතල් හෝ කෑන් මත මුද්‍රණය කරන ලෙස සහ විකුණුම්කරුවන් මුද්‍රිත දිනය සමඟ පමණක් නව තොග පිළිගැනීම පිළිබඳ සැළකිලිමත් විය යුතු බවටයි.
සුරාබදු ප්‍රධානී යූ එල් උදය කුමාර පෙරේරා පැවසුවේ ඊයේ සිට ක්‍රියාත්මක වන පරිදි සැර මත්පැන් නිෂ්පාදන සමාගම් 25ක් සහ බියර් නිෂ්පාදන සමාගමට ඔවුන්ගේ ස්ප්‍රීතු නිෂ්පාදන දිනය බෝතල් සහ කෑන් මත ඇතුළත් කරන ලෙස නියෝග කර ඇති බවයි.
ප්‍රමුඛ පෙළේ මත්පැන් නිෂ්පාදන සමාගම් කිහිපයක් දැනටමත් යම් කාලයක් තිස්සේ ඔවුන්ගේ නිෂ්පාදන දිනය මුද්‍රණය කර ඇති බවත්, සෙසු පිරිසට ද මෙම තීරණයට අනුගත වන ලෙස නියෝග කර ඇති බවත් ඔහු පැවසීය.
මිශ්‍ර කළ සහ නියාමනය නොකළ ස්ප්‍රීතු වෙළඳපොළට ඇතුළු වීම වැළැක්වීම සඳහා ආරක්ෂිත පියවරක් ලෙස දෙපාර්තමේන්තුව මෙම තීරණය ගෙන තිබේ.
චක්‍රලේඛය මගින් බලපත්‍රලාභී සිල්ලර වෙළෙන්දන්ට නිෂ්පාදන දිනය නොමැති පැරණි තොග පිළිබඳ විස්තර දෙපාර්තමේන්තුවට ලබා දෙන ලෙසත්, කිසියම් නිෂ්පාදකයකු දිනය නොමැතිව නව තොග බෙදා හරින්නේ නම් ඒ පිළිබඳ දැනුවත් කරන ලෙසත් උපදෙස් දී තිබේ.
