1987-1990 කාලය තුළ ජනතා විමුක්ති පෙරමුණ එක්සත් ජාතික පක්ෂ සාමාජිකයන් 1,960 ක් පමණ ඝාතනය කළ බවට එක්සත් ජාතික පක්ෂ සභාපති වජිර අබේවර්ධන චෝදනා කරයි.

බටලන්ද කොමිෂන් වාර්තාවේ තුන්වැනි පරිච්ඡේදයේ එම සංඛ්‍යාව දක්වා ඇති බව වජිර අබේවර්ධන ජනමාධ්‍යයට පැවැසීය.

කොළඹදී ජනමාධ්‍ය අමතමින් හිටපු පාර්ලිමේන්තු මන්ත්‍රීවරයා පැවසුවේ, ජනතා විමුක්ති පෙරමුණ ඔවුන්ගේ දෙවැනි අසාර්ථක කැරැල්ලේදී එක්සත් ජාතික පක්ෂය සහ වාමාංශික දේශපාලනඥයන් යන දෙපාර්ශ්වයම ඉලක්ක කර ගත් බවයි.

එක්සත් ජාතික පක්ෂයේ වින්දිතයන් අතර පක්ෂයේ මහලේකම්වරුන් දෙදෙනෙකු වන නන්දලාල් ප්‍රනාන්දු සහ හර්ෂ අබේවික්‍රම ද වන බව ඔහු සඳහන් කළේය.

බටලන්ද කොමිෂන් වාර්තාව පදනම් කරගෙන හිටපු ජනාධිපති රනිල් වික්‍රමසිංහට එරෙහිව පියවර ගන්නා ලෙස ඉල්ලා සිටින අය, ජවිපෙ විසින් සිදුකරන ලද කුරිරුකම් පහසුවෙන්ම අමතක කර ඇති බව වජිර අබේවර්ධන පැවැසීය.

පසුගිය වසරේ ජනාධිපතිවරණ සහ පාර්ලිමේන්තු මැතිවරණ දෙකම ජවිපෙ ප්‍රමුඛ ජාතික ජන බලවේගය ජයග්‍රහණය කළේය.