හබරණ-මරදන්කඩවල මාර්ගයේ පසුගියදා ලොරියක ගැටීමෙන් දළයක් කැඩීගිය ඇතා අද උදෑසන තිරප්පනේ ප්‍රාදේශීය ලේකම් කාර්යාලයේ ලබුනෝරුව ප්‍රදේශයේ වැවක් අසලදී සොයාගෙන ඇත.

අනතුරින් පසු, වනජීවී සංරක්ෂණ දෙපාර්තමේන්තුවේ කණ්ඩායම් කිහිපයක් තුවාල ලැබූ සත්වයා සොයා සෝදිසි මෙහෙයුමක් දියත් කළහ.

තුවාල ලැබූ සත්වයා අද උදෑසන වැව අසල රැඳී සිටිනු වනජීවී නිලධාරීන් විසින් සොයාගෙන ඇති අතර, ඇතා නැවත තම රංචුවට එක්වී ඇති බව තහවුරු කර ඇත.

පණ්ඩුලගම වනජීවී පශු වෛද්‍ය ඒකකය ඇතාට අවශ්‍ය වෛද්‍ය ප්‍රතිකාර ලබාදීමට නියමිතය.

මාර්තු 07 වැනි දින හබරණ-මරදන්කඩවල මාර්ගයේ ගලපිටගල ප්‍රදේශයේ වාර්තා වූ අනපේක්ෂිත අනතුරකින් ඇතාගේ දළයක් අහිමි විය.

අලියකු සහ ඇතකු මාර්ගය හරහා ගමන් කරමින් සිටියදී, ඇතා භාණ්ඩ ප්‍රවාහනය කරන ලොරියක ගැටී ඇති ආකාරය අසල තිබූ කැමරාවක සටහන්ව ඇත.

සිද්ධියෙන් පසු, ඇතාගේ දළයක් අහිමි වී ඇති අතර, අනතුරෙන් ලොරියට අර්ධ වශයෙන් හානි සිදුවී ඇත.