අනුරාධපුර ශික්ෂණ රෝහලේ වෛද්‍යවරියකට ලිංගික අතවර කිරීමේ සිද්ධිය සම්බන්ධයෙන් අත්අඩංගුවට ගත් සැකකරුගේ නිවසේ තිබී ජීව අත්බෝම්බයක් පොලිසිය විසින් සොයාගෙන ඇත.

ගල්නෑව පොලිසිය සහ පොලිස් විශේෂ කාර්ය බලකාය (STF) විසින් අද (14) උදෑසන සැකකරුගේ ගල්නෑව ප්‍රදේශයේ පිහිටි නිවසෙහි ඒකාබද්ධ සෝදිසි මෙහෙයුමක් සිදුකළ බව පොලිසිය පැවසීය.

වෛද්‍යවරියගේ අතුරුදහන් වූ ජංගම දුරකථනය සොයාගැනීම සඳහා සිදුකරන ලද වැටළීමකදී මෙම අත්බෝම්බය සොයාගෙන ඇත.

සැකකරු ඊයේ (13) අනුරාධපුර ප්‍රධාන මහේස්ත්‍රාත් අධිකරණයට ඉදිරිපත් කරන ලද අතර, එහිදී පොලිසිය පැය 48 ක් රඳවා තබාගෙන ප්‍රශ්න කිරීමට අවසර ලබාගත්තේය.

මාර්තු 10 වැනි දින අනුරාධපුර ශික්ෂණ රෝහලේ වෛද්‍යවරියකට වෛද්‍යවරුන්ගේ නිල නිවාසයේදී නාඳුනන පුද්ගලයෙකු විසින් ලිංගික අතවර කරන ලදී.

ඒ අනුව, ප්‍රධාන සැකකරු වන 34 හැවිරිදි ගල්නෑව ප්‍රදේශයේ පදිංචිකරුවෙක් බදාදා (12) දින ගල්නෑව පොලිසිය සහ අනුරාධපුර පොලිස් විශේෂ කාර්ය බලකාය එක්ව ගල්නෑව ප්‍රදේශයේ වනාන්තර ප්‍රදේශයක සැඟවී සිටියදී අත්අඩංගුවට ගන්නා ලදී.

ප්‍රශ්න කිරීම්වලදී අනාවරණය වූ තොරතුරු මත පදනම්ව, වෛද්‍යවරියට තර්ජනය කිරීමට යොදා ගත් පිහියද පොලිසිය විසින් සොයාගන්නා ලදී.