විපක්ෂ මන්ත්‍රී නීතිඥ නිසාම් කාරියප්පර් පවසන්නේ, වැඩතහනමට ලක් වූ පොලිස්පති දේශබන්දු තෙන්නකෝන් අධිකරණයේ ගොනුකර ඇති රිට් පෙත්සම හරහා ඔහුව සොයාගත හැකි බවයි.

පාර්ලිමේන්තුව අමතමින් මන්ත්‍රී කාරියප්පර් පෙන්වාදුන්නේ, අභියාචනාධිකරණයේ රිට් පෙත්සමක් ගොනුකිරීමේදී තෙන්නකෝන් සාම විනිසුරුවරයකු ඉදිරියේ අත්සන් කර දිවුරුම්දිය යුතු බැවින්, මෙම පෙත්සම හරහා ඔහු සිටින ස්ථානය තීරණය කළහැකි බවයි.

“දේශබන්දු තෙන්නකෝන්ට එරෙහිව අත්අඩංගුවට ගැනීමේ වරෙන්තුව අත්හිටුවන ලෙස නියෝගයක් ඉල්ලා අභියාචනාධිකරණයේ රිට් පෙත්සමක් ගොනුකර තිබෙනවා. අභියාචනාධිකරණය ඉදිරියේ රිට් පෙත්සමක් ඉදිරිපත් කිරීමේදී දිවුරුම්දිය යුතුයි. සාමවිනිසුරුවරයෙක් ඉදිරියේ දිවුරුම්දිය යුතුයි. ඔහු සාමවිනිසුරුවරයෙක් ඉදිරියේ ද පෙත්සමට අත්සන් කළ යුතුයි. එම ලේඛනය දැන් අධිකරණයේ තිබෙනවා. අපට අදාළ සාමවිනිසුරු හමුවුණොත් දේශබන්දුව සොයාගන්න පුළුවන්” ඔහු පැවැසීය.

පොලිසිය මේ ආකාරයෙන් සිතා බැලිය යුතු බව පවසමින් මන්ත්‍රී නිසාම් කාරියප්පර් මෙසේද පැවැසීය; “අපේ CID එකට මොකද වෙලාතියෙන්නේ කියලා මම දන්නේ නැහැ.”

වැලිගම ප්‍රසිද්ධ හෝටලයක 2023 වෙඩි තැබීමේ සිද්ධිය සම්බන්ධයෙන් වැඩතහනමට ලක් වූ පොලිස්පති දේශබන්දු තෙන්නකෝන් වහාම අත්අඩංගුවට ගන්නා ලෙස අධිකරණය විවෘත වරෙන්තුවක් නිකුත්කර ඇත.

පසුගිය සතියේ, දේශබන්දු තෙන්නකෝන්, තමා අත්අඩංගුවට ගැනීම සඳහා මාතර මහේස්ත්‍රාත්වරයාගේ නියෝගය අත්හිටුවන ලෙස අතුරු නියෝගයක් ඉල්ලා අභියාචනාධිකරණයට රිට් පෙත්සමක් ගොනුකළේය.