බාලවයස්කාර දැරියක් ජෝර්දානයට ගෘහ සේවිකාවක් ලෙස යැවීම සම්බන්ධයෙන් 59 හැවිරිදි පුද්ගලයකුට බරපතල වැඩ සහිත වසර 12 ක සිරදඬුවමක් නියම කර තිබේ.

ඇගේ මිත්තණිය සමඟ ජීවත් වූ බාලවයස්කාර දැරිය සඳහා විත්තිකරු ව්‍යාජ උප්පැන්න සහතිකයක් සහ ජාතික හැඳුනුම්පතක් නිර්මාණය කර ඇති බවට වාර්තා වේ.

තීන්දුව ප්‍රකාශයට පත්කරමින් කොළඹ මහාධිකරණ විනිසුරු නවරත්න මාරසිංහ විත්තිකරුට රුපියල් 25,000 ක දඩයක් නියම කළ අතර වින්දිත දැරියට රුපියල් 300,000 ක වන්දියක් ගෙවීමට ද නියෝග කළේය.

වන්දි ගෙවීමට අපොහොසත් වීමෙන් තවත් වසර එකහමාරක සිරදඬුවමක් නියම වන බව විනිසුරුවරයා අනතුරු ඇඟවීය.

අදාළ දැරිය විදේශගත වී මාස දෙකක් ඇතුළත ඇය සේවය කළ නිවැසියන් විසින් වධහිංසා පමුණුවා සහ අපයෝජනයට ලක්කර ඇති බවත්, පසුව 2008 දී ශ්‍රී ලංකාවට ආපසු පැමිණ ඇති බවත් අධිකරණයේදී හෙළිව තිබේ.

ඇය නැවත නොපැමිණියේ නම්, මැද පෙරදිගදී මරණ දඬුවම නියම කරන ලද රිසානා නෆීක්ට සිදු වූ ඉරණමම දැරියට අත්විඳිය හැකිව තිබූ බව විනිසුරුවරයා එහිදී සඳහන් කර ඇත.

කල්මුණේ ප්‍රදේශයේ පදිංචි තිදරු පියෙකු වන විත්තිකරුට එරෙහිව මෙම අධිචෝදනා පත්‍රය අධිකරණයට ඉදිරිපත් කරනු ලබන්නේ දැරිය සම්බන්ධයෙන් සිදුකරන ලද පරීක්ෂණවලින් වසර නවයකට පසුවය.