සොරකම් කරන ලද ලොරි රථයක් නතර කිරීමට දුන් නියෝග නොතැකීම හේතුවෙන් පොලිස් නිලධාරීන් කඩුවෙලදී එම ලොරි රථයට වෙඩි තබා සැකකරු අත්අඩංගුවට ගෙන තිබේ.

අත්අඩංගුවට ගත් සැකකරු කැලණියේ පදිංචි වයස අවුරුදු 25ක පුද්ගලයකු බව පොලිසිය පවසයි.

සැකකරු අත්අඩංගුවට ගත් පසු, ඔහු සතුව තිබී දේශීයව නිෂ්පාදනය කරන ලද අත්බෝම්බයක් පොලිසිය විසින් සොයාගෙන තිබේ.

නොරොච්චෝලේ ප්‍රදේශයේ සුපිරි වෙළඳසැලකට යෑමට එළවළු පටවා ගත් මෙම ලොරිය වත්තල තේ කඩයක් අසල නවතා රියදුරු තේ පානය කිරීමට පිටත්ව ගොස් තිබේ.

මේ අතරතුර, සැකකරු ලොරියසොරකම් කර ඇති බව පොලිසිය පවසයි.

පසුව ත්‍රිරෝද රථයකින් ලොරිය ලුහුබැඳ ගිය ද එය නැවැත්වීමට නොහැකි වීම නිසා වාහනයේ GPS පද්ධතිය හරහා එය ලුහුබැඳීමට මැදිහත් වීමට බලධාරීන්ට සිදුව තිබේ.

ඒ අනුව පොලිසිය මුලින් වැල්ලම්පිටිය ප්‍රදේශයේදී ලොරිය නැවැත්වීමට උත්සාහ කළ ද සැකකරු එම නියෝග නොතකා ගොස් තිබේ.

පසුව පොලිස් කණ්ඩායම් කිහිපයක් වාහනය ලුහුබැඳ ගිය අතර, තලාහේන සහ කඩුවෙල ප්‍රදේශවලදී වෙඩි තැබීම් කිහිපයක් ද සිදුකර ඇත.

පලායමින් සිටියදී සැකකරු පැදවූ ලොරි රථය මෝටර් රථ දෙකක, බස් රථයක සහ ත්‍රිරෝද රථයක ද ගැටී ඇති බව පොලිසිය කියයි.

මීට අමතරව, ඉසුරුපායේ අධ්‍යාපන අමාත්‍යාංශය පිටුපස ගේට්ටුවකට ද මෙම සිද්ධිය හේතුවෙන් හානි සිදුවී තිබේ.

පලායෑම නැවැත්වීම සඳහා බලධාරීන් කඩුවෙල නගරයේ දී ලොරි රථ භාවිත කර මාර්ගය අවහිර කිරීමට කටයුතු කර තිබේ.

කෙසේවෙතත්, සැකකරු එහිදී ලොරි රථය ආපසු හරවාගෙන යෑමට උත්සාහ කර ඇත.

ඒ මොහොතේ, පොලිස් නිලධාරීන් ලොරියට තවත් වෙඩි තැබීමක් සිදු කර ඇති අතර, අවසානයේ එය කඩුවෙල අධිකරණ සංකීර්ණය අසල නතර වී තිබේ.

සැකකරු පලා යෑමට උත්සාහ කරන අතරතුර අත්අඩංගුවට ගෙන ඇත.

වැඩිදුර නීතිමය කටයුතු සඳහා ඔහු කඩුවෙල මහේස්ත්‍රාත් අධිකරණයට ඉදිරිපත් කිරීමට නියමිතය.