කොටහේන ප්‍රදේශයේ මෑතකදී සිදු වූ වෙඩි තැබීමේ සිද්ධියට සම්බන්ධ සැකකරුවන්ගේ මරණ පිළිබඳව මහජන ආරක්ෂක අමාත්‍ය ආනන්ද විජේපාල වැඩබලන පොලිස්පතිවරයාගෙන් වාර්තාවක් ඉල්ලා තිබේ.

හැකි ඉක්මනින් වාර්තාව ඉදිරිපත් කරන ලෙස වැඩබලන පොලිස්පතිවරයාගෙන් ඉල්ලා ඇති බව අමාත්‍ය විජේපාල ජනමාධ්‍ය වෙත පවසා ඇත.

පෙබරවාරි 21 වන දින, යතුරුපැදියකින් පැමිණි පුද්ගලයන් දෙදෙනකු කොටහේන වීදියේ ජංගම දුරකථන සාප්පුවකදී 38 හැවිරිදි පුද්ගලයකුට වෙඩිතබා ප්‍රදේශයෙන් පළාගොස් තිබේ.

වෙඩි තැබීමට සම්බන්ධ සැකකරුවන් දෙදෙනා එදිනම අත්අඩංගුවට ගනු ලැබුවේ ටී -56 ප්‍රහාරක රයිෆලයක් සහ වෙඩි තැබීමට භාවිත කළ යතුරුපැදිය සමඟිනි.

එදිනම රාත්‍රියේ, සඟවා තිබූ ආයුධයක් පිළිබඳ තොරතුරු ලැබීමෙන් පසු පොලිස් නිලධාරීන් සැකකරුවන් වෙනත් ස්ථානයකට ගෙනගොස් ඇත.

සැකකරුවන් පොලිසියට වෙඩි තැබීමට උත්සාහ කළ බවත්, එහිදී පොලිසිය එල්ල කළ වෙඩි ප්‍රහාරයකින් සැකකරුවන් දෙදෙනාම තුවාල ලබා රෝහලේදී මියගිය බව පොලිසිය ප්‍රකාශ කළේය.

කෙසේවෙතත් මෙම මරණ දෙක සම්බන්ධයෙන් රජයට විශාල විරෝධයක් එල්ලවිය.