මුදල් හා ක්‍රමසම්පාදන නියෝජ්‍ය අමාත්‍ය ආචාර්ය හර්ෂණ සූරියප්පෙරුම අද (25) පාර්ලිමේන්තුවේදී අනාවරණය කළේ, ශ්‍රීලන්කන් ගුවන් සේවය වසර ගණනාවක් තිස්සේ භාවිතයට නොගත් ගුවන් යානා තුනක් සඳහා මසකට ඇමරිකානු ඩොලර් 900,000 ක වාරික මුදලක් ගෙවන බවයි.

පාර්ලිමේන්තුවේදී මේ කාරණය සම්බන්ධයෙන් අදහස් දැක්වූ නියෝජ්‍ය අමාත්‍යවරයා, ජාතික ගුවන් සේවය සතුව දැනට ගුවන් යානා 22 ක් ඇති බවත්, ශ්‍රී ලංකන් ගුවන් සේවය එහි ප්‍රධාන ගුවන් සේවා මෙහෙයුම්වල කාර්ය මණ්ඩල සාමාජිකයන් 3,194 ක් සහ එහි උපායමාර්ගික ව්‍යාපාරික ඒකකවල සේවකයන් 2,862 ක් සේවයේ යොදවා ඇති බවත් සඳහන් කළේය.

ගුවන් සේවය ශක්තිමත් කිරීම සඳහා 2025 දී ආරම්භ වන පස්අවුරුදු සැලැස්මක් හඳුන්වා දී ඇති බව ආචාර්ය සූරියප්පෙරුම තවදුරටත් සඳහන් කළේය.

වසර 5 ක කාලයක් තුළ මෙහෙයුම් ලාභදායීතාවය අත්කර ගැනීමේ සහ රජයේ සහාය ලබාගැනීමේ අපේක්ෂාවෙන් අමාත්‍යාංශය දැනට මෙම සැලසුම් තක්සේරු කරමින් සිටින බව ද ඔහු අවධාරණය කළේය.