February 24, 2025
‘ගණේමුල්ලේ සංජීව’ නමැති කුප්‍රකට අපරාධකරු සහ මත්ද්‍රව්‍ය ජාවාරම්කරුගේ ඝාතනයට වගකිව යුතු තුවක්කුකරුව, අදාළ අපරාධයේ සැලසුම්කරුවන් විසින් එම අපරාධය සඳහා පොළඹවා ගෙන ඇත්තේ ෆේස්බුක් සමාජ මාධ්‍ය ඔස්සේ බව පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී බුද්ධික මනතුංග අනාවරණ කර තිබේ.
අද දෙරණ නාලිකාවේ ‘බිග් ෆෝකස්’ වැඩසටහනට එක්වී අදහස් දක්වමින් ඔහු පැවසුවේ, හිටපු හමුදා නිලධාරියකු වන සැකකරුට අපරාධකරුවන් ෆේස්බුක් හරහා පණිවිඩ යොමුකර ”රැකියාවක් නැහැ නේද? නිකන් නේද ඉන්නේ? පොඩි වැඩක් කරමුද?” යනුවෙන් පවසා ඔහුව ඊට පොළඹවා ගෙන ඇති බවයි.
මෙම පණිවිඩ හුවමාරුව අවසානයේ සැකකරු ඝාතනයට සම්බන්ධ වීමට හේතු වී ඇති බවද ඔහු වැඩිදුරටත් පැවසීය.
“පසුගිය අත්දැකීම් අනුව අපට පැහැදිලිවම පෙනෙන්නේ මෙවැනි අපරාධවල නිරතවූවන්ගෙන් බහුතරය හිටපු ත්‍රිවිධ හමුදාවේ හෝ පොලිසියේ සාමාජිකයන් බවයි. ඔවුන් අත්අඩංගුවට ගන්නා ලෙස ආරක්ෂක ලේකම්වරයා උපදෙස් දුන්නා. හමුදා සාමාජිකයින් නීත්‍යානුකූලව නිදහස් නොවී පළාගියහොත් එය නීතිය යටතේ වරදක් ලෙස සළකනු ලබනවා. ඔවුන් අත්අඩංගුවට ගැනීමට ප්‍රතිපාදන තිබෙනවා” යනුවෙන් ජ්‍යෙෂ්ඨ පොලිස් අධිකාරී බුද්ධික මනතුංග එහිදී ප්‍රකාශ කළේය.
‘ගණේමුල්ලේ සංජීව’ ඝාතනය පිටුපස සිටි අපරාධකරුවන්, විශේෂයෙන්ම එම වෙඩික්කරුවා ඉලක්ක කර ඇත්තේ ඔහු රැකියා විරහිතව සිටියදී සහ ඔහු තවදුරටත් හමුදා සේවයේ නොසිටින විටදී බව ඔහු වැඩිදුරටත් පැහැදිලි කළේය.
එමෙන්ම පොලිස් මාධ්‍ය ප්‍රකාශකවරයා පැවසුවේ, සමාජ මාධ්‍ය මෙවලමක් කරගනිමින් ඔවුන් සැකකරුව මෙහෙයවා අපරාධය සිදුකර ඇති බවයි.
“විශේෂයෙන්ම, ෆේස්බුක් හරහා ඔහුව පොළඹවා ගැනීමට පෙර ඔහු හමුදාවෙන් ඉවත් වූ බව ඔවුන් සහතික කරගෙන තිබෙනවා. ඔවුන් සම්බන්ධතා ආරම්භ කර ක්‍රමයෙන් ඔහුට බලපෑම් කළා,” ඔහු වැඩිදුරටත් පැවසීය.
“සාපරාධී ක්‍රියාකාරකම්වල යෙදෙන්නන්ට එරෙහිව දැඩි ක්‍රියාමාර්ග ගන්නා අතර පොලිසිය සහ හමුදාව හැර ගිය අය පිළිබඳ ඔවුන්ගේ නිරීක්ෂණ තීව්‍ර කර තිබෙනවා. නුදුරු අනාගතයේ දී අපි මෙම පුද්ගලයින් සොයාගෙන අත්අඩංගුවට ගැනීමට කටයුතු කරනවා,” ජ්‍යෙෂ්ඨ පොලිස් අධිකාරී බුද්ධික මනතුංග තහවුරු කළේය.
