විදෙස් රටක නිෂ්පාදනය කරන ලද බැරල් දෙකේ උණ්ඩ යෙදිය හැකි ගිනි අවියක් සමග මත්තලදී අත්අඩංගුවට ගත් බෙලිඅත්ත ප්‍රාදේශීය සභාවේ හිටපු සභාපතිවරයා රුපියල් ලක්ෂ 10 බැගින් වූ ඇප දෙකක් මත මුදාහරින ලෙස හම්බන්තොට මහේස්ත්‍රාත් අධිකරණය නියම කර තිබේ.

මෙලෙස ඇප මත මුදාහැරුණේ බෙලිඅත්ත ප්‍රදේශයේ පදිංචි 62 හැවිරිදි සිරිල් මුණසිංහ නමැති පුද්ගලයෙකි.

සැකකාර හිටපු සභාපතිවරයාට අයත් මත්තල ගම්මිරිස් වගාවක් පිටුපස ඇති නිවෙසකදී මෙම ගිනිඅවිය සමග ඔහුව අත්අඩංගුවට ගෙන තිබිණි.

සැකකරු ශ්‍රී ලංකා පොදුජන පෙරමුණ නියෝජනය කරමින් දේශපාලනයේ නිරතවූවකු වන අතර, මීට පෙරද GI බට සොරකමක් සම්බන්ධයෙන් අත්අඩංගුවට පත්ව තිබේ.