February 17, 2025
මහජන ආරක්ෂක අමාත්‍ය ආනන්ද විජේපාලගේ පාර්ලිමේන්තු මන්ත්‍රී ධුරය අහෝසි කරන ලෙස නියෝගයක් නිකුත් කරන ලෙස ඉල්ලා ගොනුකර ඇති පෙත්සම විභාගයකින් තොරව ප්‍රතික්ෂේප කරන ලෙස ඉල්ලා නීතිපතිවරයා අද අභියාචනාධිකරණය හමුවේ මූලික විරෝධතා මතුකළේය.
ශ්‍රී ලංකා පොදුජන පෙරමුණේ පරිපාලන ලේකම් රේණුක පෙරේරා විසින් ගොනුකරන ලද පෙත්සම සළකා බලනුයේ අභියාචනාධිකරණයේ වැඩබලන සභාපති මොහොමඩ් ලෆාර් තාහීර් සහ විනිසුරු කේ.එම්.එස්. දිසානායක විසිනි.
නීතිපතිවරයා වෙනුවෙන් පෙනීසිටි අතිරේක සොලිසිටර් ජෙනරාල්වරයා අධිකරණයට දන්වා සිටියේ, පෙත්සමේ වැදගත්ම පාර්ශවකරුවන් වගඋත්තරකරුවන් ලෙස නම්කර නොමැති බවයි.
ජනාධිපතිවරයාගේ නියෝගය මත ජනාධිපති ලේකම්වරයා විසින් ජනාධිපති කාර්ය මණ්ඩල ප්‍රධානියා පත්කරනු ලබන බව පෙන්වා දුන් අතිරේක සොලිසිටර් ජෙනරාල්වරයා, ජනාධිපති ලේකම්වරයා වගඋත්තරකරුවෙකු ලෙස නම්කර නොමැති බවත්, එය බරපතල නීතිමය අඩුපාඩුවක් බවත් පැවසීය.
ඒ අනුව, අතිරේක සොලිසිටර් ජෙනරාල්වරයා මෙම පෙත්සම තවදුරටත් පවත්වාගෙන යෑමට හැකියාවක් නොමැති බව පැවසූ අතර, එය විභාගයකින් තොරව නිෂ්ප්‍රභ කරන ලෙස ඉල්ලා සිටියේය.
මෙම අවස්ථාවේදී, වගඋත්තරකාර අමාත්‍ය ආනන්ද විජේපාල වෙනුවෙන් අධිකරණය හමුවේ පෙනීසිටි නීතිඥ උපුල් කුමාරප්පෙරුම තර්ක කළේ, ජනාධිපතිවරයාගේ කාර්ය මණ්ඩල ප්‍රධානියා පත්කිරීම ජනාධිපතිවරයා විසින්ම සිදුකරන ලද බවත්, රිට් පෙත්සමක් ගොනුකිරීමෙන් අභියාචනාධිකරණය ඉදිරියේ ජනාධිපතිවරයාගේ නිල ක්‍රියාව අභියෝගයට ලක්කිරීම අවසර නොමැති බවත්ය.
එබැවින්, මෙම පෙත්සම සළකා බැලීමට අභියාචනාධිකරණයට අධිකරණ බලයක් නොමැති බව පවසමින් නීතිඥ උපුල් කුමාරප්පෙරුම සිය මූලික විරෝධතා ඉදිරිපත් කළ අතර එය නිෂ්ප්‍රභ කරන ලෙස ඉල්ලා සිටියේය.
පෙත්සම්කරු වෙනුවෙන් පෙනීසිටි නීතිඥ විශ්ව පෙරේරා සඳහන් කළේ, අමාත්‍යවරයා ජනාධිපතිවරයාගේ කාර්ය මණ්ඩල ප්‍රධානී ලෙස පත්කිරීම කිසිදු ආකාරයකින් ඔහු විසින් අභියෝගයට ලක්නොකරන බවයි.
වගඋත්තරකාර අමාත්‍යවරයා පාර්ලිමේන්තුවේ අසුන් ගැනීමට හෝ ඡන්දය ප්‍රකාශ කිරීමට සුදුසුකම් නොලබන බවට ඇති කරුණ මත පමණක් තම තර්කය පදනම් වූ බව ඔහු අවධාරණය කළේය.
ඉදිරිපත් වූ තර්ක සළකා බලමින්, අභියාචනාධිකරණයේ වැඩබලන සභාපතිවරයා ප්‍රකාශ කළේ, මෙම පෙත්සම ඉදිරියට ගෙනයෑමේ හැකියාව සම්බන්ධයෙන් වගඋත්තරකරුවන් මූලික විරෝධතා මතුකර ඇති බැවින්, පළමුව ඒ සම්බන්ධයෙන් තීන්දුවක් නිකුත් කිරීම අවශ්‍ය බවයි.
එබැවින්, 2025 මාර්තු 18 වැනි දිනට පෙර මූලික විරෝධතා පිළිබඳ ලිඛිත කරුණු ඉදිරිපත් කරන ලෙස විනිසුරුවරයා පෙත්සමට සම්බන්ධ සියලුම පාර්ශ්වයන්ට උපදෙස් දුන්නේය.
