කොළඹ නගර සභාව ආසන්නයේ පූජ්‍ය බද්දේගම විමලවංශ මාවතේ මල් අලෙවිකරුවන් පවසන්නේ, පෙර වසරවලට සාපේක්ෂව වැලන්ටයින් දිනය සඳහා වැඩි ගනුදෙනුකරුවන් සංඛ්‍යාවක් රෝස මල් මිලදී ගන්නා බවයි.

ඔවුන්ට අනුව නැවුම් රතු රෝස මලක් සඳහා අඩුම මිල රු. 200 කි.

තනි රතු රෝස මලක් ඔතා රු. 250 ක් වන අතර රතු රෝස මල් කළඹක් රු. 8,000 ත් 12,000 ත් අතර වේ.

රෝස මල් කිහිපයක් සහිත ඇතැම් මල් කළඹක සාමාන්‍ය මිල රු. 10,500 ක් වන බව විකුණුම්කරුවෝ පවසති.

නුවරඑළියේ වගාකරන දේශීය රෝස මලක ඉහළම මිල රු. 400 ක් වන අතර ඉන්දියාවෙන් ආනයනය කරන ලද රෝස මලක මිල රු. 300 ක් පමණ වන බව පැවැසේ.

මිශ්‍ර මල් සහිත සාමාන්‍ය මල් කළඹක අඩුම මිල රු. 2,000 ක් වන අතර, ඉහළම මිල රු. 4,500 කි.

සාමාන්‍ය මල් කළඹක සාමාන්‍ය මිල රු. 2,800 ක් පමණ වන බව වෙළෙන්දෝ වැඩිදුරටත් සඳහන් කරති.