February 13, 2025
මතභේදයට තුඩු දී ඇති කන්කසන්තුරේ තිස්ස විහාරය සම්බන්ධයෙන් සාකච්ඡා කිරීම සඳහා අදාළ අමාත්‍යාංශ සහ යුද හමුදාව සමග සාකච්ඡාවක් කැඳවීමට බුද්ධශාසන, ආගමික හා සංස්කෘතික කටයුතු අමාත්‍යාංශය සූදානම් වන බව වාර්තා වේ.
The Daily Morning වෙත අදහස් දක්වමින් එම අමාත්‍යාංශයේ ලේකම් ඒ.එම්.පී.එම්.බී. අතපත්තු පවසා ඇත්තේ, ජාතික සමගියට ඇති සංවේදී බලපෑම සැළකිල්ලට ගනිමින් විහාරස්ථානය සම්බන්ධයෙන් පවතින ඇතැම් ව්‍යාකූලතා පැහැදිලි කිරීමට අමාත්‍යාංශය කටයුතු කරමින් සිටින බවයි.
එම විහාරස්ථානය දැනට පරිපාලනය කරනු ලබන්නේ යුද හමුදාව විසින් බවත්, කෙසේවෙතත් එම විහාරස්ථානය බෞද්ධ කටයුතු කොමසාරිස් ජනරාල් යටතේ ලියාපදිංචි කිරීමට රජය අදහස් කරන බව ද එහිදී ලේකම්වරයා පැහැදිලි කර ඇත.
“විහාරය පාලනය කරන්නේ හමුදාව විසින් වන අතර, එහි පැමිණ සිටින භික්ෂූන් වහන්සේ නමක් කටයුතු කරමින් ඉදිකිරීම් සිදුවෙමින් පවතිනවා. ආරක්‍ෂක අමාත්‍යාංශයේ පැවති සාකච්ඡාවකදී ප්‍රකාශ කෙරුණේ එය ඔවුන්ට තවදුරටත් පරිපාලනය කළ නොහැකි බවත් ඒ වෙනුවට බෞද්ධ කටයුතු කොමසාරිස් ජනරාල් යටතේ ලියාපදිංචි කළ යුතු බවයි. මට දන්වා ඇති පරිදි ඒ නමින් දැනටමත් පන්සලක් ලියාපදිංචි කර ඇතත් එහි ඇත්තේ ඉඩමක් පමණයි. මීට අමතරව යුධ හමුදාව සහ නාවික හමුදාව මගින් ක්‍රියාත්මක වන විහාරස්ථාන දෙකක් ද පවතින බව වාර්තා වෙනවා. මෙයයි ව්‍යාකූලත්වයට හේතු වී තිබෙන්නේ. අපි මේ ප්‍රශ්නයට විසඳුමක් සෙවිය යුතුයි.” ඔහු පවසා ඇත.
“හමුදාවට එය පවත්වාගෙන යාමට නොහැකි නම් අපි ප්‍රශ්නය විසඳීමට පියවර ගත යුතුයි”
ඒ අනුව විහාරස්ථානය සම්බන්ධයෙන් තීරණයකට එළැඹීම සඳහා අදාළ අමාත්‍යවරුන් සහ නිලධාරීන් අතර සාකච්ඡාවක් පැවැත්වීමට බුද්ධශාසන, ආගමික හා සංස්කෘතික කටයුතු අමාත්‍යාංශය විසින් යෝජනා කර ඇති බවද ඔහු සඳහන් කරයි.
මේ අතර තිස්ස විහාරය බලහත්කාරයෙන් ඉවත් කිරීමට අපේක්ෂා කරන බවට ඉලංකෙයි තමිල් අරසු කට්චි පක්‍ෂ නායක, විපක්‍ෂ පාර්ලිමේන්තු මන්ත්‍රී එස්. ශ්‍රීධරන් අනතුරු අඟවා තිබේ.
ජනමාධ්‍ය වෙත අදහස් දක්වමින් ශ්‍රීධරන් ප්‍රකාශ කර ඇත්තේ, තිස්ස විහාරය ඇතුළු තවත් අය විසින් අල්ලාගෙන සිටින ඉඩමේ හිමිකරුවන් තමන් අනවසර ඉදිකිරීමක් ලෙස සඳහන් කළ දෙයට එරෙහිව කඩිනමින් පියවර ගනු ඇති බවයි.
සාමාන්‍ය ජනතාව විසින් රජයේ ඉඩමක ඉදිකර තිබූ ඉදිකිරීම් බලහත්කාරයෙන් ඉවත් කර ඇති බවත්, එවැනි ඉදිකිරීම් නීතිවිරෝධී බව පවසමින් රජය ක්‍රියාත්මක වන බවටත් ඔහු චෝදනා කරයි.
