ජනවාරි 27 වන දින නීතිපතිවරයා විසින් නිකුත් කරන ලද නීති උපදෙස් සම්බන්ධයෙන්, කරුණුමය වශයෙන් වැරදි සහ නොමඟ යවන සුළු ජනමාධ්‍ය වාර්තා පළව ඇති බව නීතිපති දෙපාර්තමේන්තුවේ නීති නිලධාරීන්ගේ සංගමය පෙන්වාදෙයි.

එම සංගමය ඊයේ නිකුත් කළ නිවේදනයක දැක්වෙන්නේ, සැකකරුවන් තිදෙනෙකු නිදහස් කිරීමට උපදෙස් දීමේදී නිසි ක්‍රියා පටිපාටි අනුගමනය කර ඇති බවයි.

අදාළ සියලු ද්‍රව්‍යමය කරුණු සහ නීතිමය සලකා බැලීම් මත පදනම්ව තීරණය ගත් බව එහි සඳහන්වන අතර, දේශපාලන හෝ මහජන මතය ප්‍රතිඵලයට බලපෑම් නොකළ බව අවධාරණය කර ඇත.

“ස්වාධීන නීතිපති දෙපාර්තමේන්තුවක ලක්ෂණය වන්නේ දේශපාලන ප්‍රතිවිපාක හෝ මහජන අනුමැතිය නොසළකා තීරණ ගැනීමයි,” යනුවෙන් එම ප්‍රකාශයේ සඳහන් විය.

ස්වාධීන වෘත්තීය විනිශ්චය සඳහා ඔවුන්ගේ කැපවීම අවධාරණය කරමින්, නීතිපතිවරයා සහ අදාළ නිලධාරීන් කෙරෙහි සංගමය සිය විශ්වාසය තහවුරු කරයි.

නීතිපතිවරයා ධුරයෙන් ඉවත් කිරීමට ගන්නා ඕනෑම උත්සාහයකට තමන් විරුද්ධ වන බවට ද අනතුරු අඟවයි.