පොලිස් ඇප මත මුදාහැරීමෙන් පසු මියගිය බව පැවසෙන වාද්දුව ප්‍රදේශයේ පුද්ගලයකුගේ මරණය සම්බන්ධයෙන් විමර්ශනය කරන ලෙස වැඩබලන පොලිස්පතිවරයා පානදුර අපරාධ විමර්ශන කොට්ඨාශයට නියෝග කර තිබේ.

පොලිසිය විසින් පුද්ගලයකුට පහර දී ඝාතනය කළ බවත්, ඔහු එක් දරු පියකු බවත් චෝදනා කරමින් ඊයේ රාත්‍රියේ වාද්දුව පොලිස් ස්ථානය ඉදිරිපිටට එක්වූ 40 දෙනකුගෙන් සමන්විත පිරිසක් පොලීසියට විරෝධය පළකර තිබිණි.

මියගිය පුද්ගලයා වාද්දුව, තල්පිටිය ප්‍රදේශයේ පදිංචිකරුවකු වන අතර ඔහු ඇප මත මුදාහැරීමෙන් පසු ලේ වමනය කර මියගොස් ඇති බව විරෝධතාකරුවන් චෝදනා කර තිබේ.

වින්දිතයාට සහ ඔහුගේ පවුලේ අයට යුක්තිය ඉල්ලා නිවැසියෝ පොලිසිය ඉදිරිපිට රැස්ව සිටියහ.

තත්ත්වය කළමනාකරණය කිරීම සඳහා බණ්ඩාරගම, පින්වත්ත, මොරොන්තුඩුව, හිරණ ඇතුළු අවට පොලිස් ස්ථානවලින් නිලධාරීන් කැඳවා තිබිණි.

පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී බුද්ධික මනතුංග පැවසුවේ, සිද්ධිය සම්බන්ධයෙන් පරීක්ෂණයක් ආරම්භ කරන ලෙස වැඩබලන පොලිස්පතිවරයා පානදුර ජ්‍යෙෂ්ඨ පොලිස් අධිකාරීවරයාට උපදෙස් ලබා දී ඇති බවයි.

පශ්චාත් මරණ පරීක්ෂණය අද සිදුකිරීමට නියමිත බවත්, ඝාතනයට ලක්වූ පුද්ගලයාට පොලිස් ස්ථානය තුළදී පහරදී ඇති බවට විද්‍යාත්මක සාක්ෂිවලින් තහවුරු වුවහොත් ඊට වගකිව යුතු නිලධාරීන්ට එරෙහිව දැඩි ක්‍රියාමාර්ග ගන්නා බවද ඔහු පැවසුවේය.