මේ සතියේ ඩුබායි සිට කොළඹ බලා ගමන් කළ ශ්‍රීලන්කන් ගුවන් සේවයේ ගුවන් යානයක තවත් මගියෙකුගේ ගමන් මලුවලින් වටින අත් ඔරලෝසු සහ අනෙකුත් වටිනා භාණ්ඩ සොරකම් කළ බවට චෝදනා එල්ල වූ චීන මගියකු නීතිමය ක්‍රියාමාර්ගවැලි බේරී ගොස් ඇත.

ඊට හේතුව සොරකමට ලක්වූ පුද්ගලයා තම පැමිණිල්ල ඉදිරියට ගෙනයෑමට අකමැති වීම බව වාර්තා වේ.

ගුවන් යානයේ ආසනවලට ඉහලින් ඇති ගමන් මලු රඳවනයේ තිබූ ඔහුගේ ගමන් මලුවලින් අයිතම කිහිපයක් අතුරුදහන් වී ඇති බව හෙළිවීමෙන් පසු, අදාළ පුද්ගලයා ඒවා සෙවීමට පටන්ගෙන ඇති අතර, පසුව ඒවා චීන මගියෙකු සතුව තිබී සොයාගෙන තිබේ.

ක්‍රියාපටිපාටියට අනුකූලව, ගුවන් සේවය බණ්ඩාරනායක අන්තර්ජාතික ගුවන් තොටුපොළේ අදාළ අංශ අමතා ඇති බව ශ්‍රීලන්කන් ගුවන් සේවයේ වාර්තා සඳහන් කරයි.

කෙසේවෙතත්, භාණ්ඩ සොයාගත් බැවින් පොලිස් පැමිණිල්ලක් ගොනුකර මෙම කාරණය ඉදිරියට ගෙනයෑමට අදාළ මගියා කැමැත්තක් දක්වා නැත.

ඒ අනුව, චීන මගියාට පිටව යෑමට අවසර ලැබුණු අතර, පසුව ඔහු රට හැර ගොස් ඇත.