තම පාර්ශවයට එල්ල කෙරෙන චෝදනා නීතිපති දෙපාර්තමේන්තුව ප්‍රතික්ෂේප කර ඇති අතර, සැකකරුවන් තිදෙනකු නිදහස් කිරීමේ නිර්දේශය ඝාතනයට ලක් වූ ජනමාධ්‍යවේදී ලසන්ත වික්‍රමතුංගගේ ඝාතන නඩුවට සම්බන්ධ නොවන බව පවසයි.

නිවේදනයක් නිකුත් කරමින් දෙපාර්තමේන්තුව පවසන්නේ, ලසන්ත වික්‍රමතුංගගේ ඝාතනය පිළිබඳ විමර්ශනයේ ඇසින් දුටු සාක්ෂිකරුවකු වූ වික්‍රමතුංගගේ රියදුරු පැහැර ගැනීම සම්බන්ධයෙන් මෙම නිර්දේශය සිදුකර ඇති බවයි.

ලසන්ත වික්‍රමතුංග ඝාතනය සම්බන්ධයෙන් විමර්ශනය අවසන් වී නොමැති බව එම නිවේදනයේ සඳහන් වේ.

තවදුරටත් විස්තර කරමින්, ලසන්ත වික්‍රමතුංගගේ රියදුරු පැහැර ගැනීම සහ ලසන්ත ඝාතනය එකම නඩු අංක 92/2009 යටතේ ගොනුකර ඇති බව එම නිවේදනයේ දැක්වේ.

නීතිමය ක්‍රියාමාර්ගවල අඩුපාඩු කිහිපයක් උපුටා දක්වමින් නීතිපති දෙපාර්තමේන්තුව පවසන්නේ, ප්‍රේම් ආනන්ද උදලගම යන එක් සැකකරුවකුට එරෙහිව නඩු පැවරීමට ප්‍රමාණවත් සාක්ෂි නොමැති බවයි.

ලසන්ත වික්‍රමතුංගගේ ක්ෂේත්‍ර සටහන් පොත අතුරුදහන් වීමට සම්බන්ධ බවට හෙට්ටිආරච්චිගේ දොන් තිස්සසිරි සුගතපාල සහ විතාරණ ආරච්චිගේ සිරිමෙවන් ප්‍රසන්න නානායක්කාර යන තවත් සැකකරුවන් දෙදෙනෙකුට චෝදනා එල්ල වී ඇති අතර, එහි ඔහු පසුපස ගිය අයගේ යතුරුපැදි ලියාපදිංචි අංක එහි අඩංගු වූ බව කියනු ලැබේ.

කෙසේවෙතත් මෙම හේතූන් මත, නීතිපතිවරයා සැකකරුවන් තිදෙනා නිදහස් කිරීමටත්, වැඩිදුර නීතිමය ක්‍රියාමාර්ග නොගැනීමටත් තීරණය කර ඇත.