ශ්‍රී ලාංකීය වෙළෙඳ ඉතිහාසයේ සුවිශේෂී අවස්ථාවක් සනිටුහන් කරමින්, මෙරට පැරණිතම වෙළෙඳ ආයතනය වන ජෝර්ජ් ස්ටුවර්ට් සහ සමාගම, මෙම වසරේදී 190 වෙනි වසරට පා තබයි. මෙම ඓතිහාසික අවස්ථාව සනිටුහන් කරමින් ජෝර්ජ් ස්ටුවර්ට් සහ සමාගම විසින් ප්‍රජා සත්කාරක වැඩසටහන් මාලාවක් මෙම වසර තුළ සංවිධානය කර ඇත. මෙම වැඩසටහන් ආයතනික සාරධර්ම පිළිබිඹුවන ආකාරයට, එම සමූහයේ අංශ හත යටතේ දියත් කිරීමට නියමිත අතර, එම වැඩසටහන් මාලාවේ උත්කර්ෂවත් සමාප්තිය 2025 අගෝස්තු මස 14වෙනි දිනට යෙදී ඇති ආයතනික නිර්මාතෘ දිනයට යෙදී ඇත.

1835 වසරේදී වෙ‌ළෙඳ බැංකුකරුවන් ලෙස ව්‍යාපාර ආරම්භ කළ කපිතාන් ජේම්ස් ස්ටුවර්ට් දක්වා මෙම ආයතනයේ අතීත උරුමය විහිදෙයි. 1860 වන විට, ඔහුගේ සහෝදරයන් වන ජෝර්ජ් සහ ජෝසප්ගේ පැමිණීමත් සමඟ, ව්‍යාපාරය කෝපි වතු කළමනාකරණය කරන නියෝජිතායතනයක් දක්වා වර්ධනය විය. ඔවුන්ගේ වාණිජමය ප්‍රයත්නයන් සෑමවිටම ප්‍රජාසත්කාරය සමඟ බැඳී තිබුණි. එහි නිර්මාතෘ ජේම්ස් ස්ටුවර්ට් මහතාගේ අවසාන කැමැත්තට අනුව සිය ඉමහත් වූ වත්කම් සහ දේපළ එකල කොළඹ අගරදගුරු තුමන් වෙත, භාරකාර අරමුදලක් තුළින් පවරාදීමෙන්, මෙම සමාගම සතු ප්‍රජාසත්කාරයට ඇති නැඹුරුව මැනවින් පිළිබිඹු වේ.

ජෝර්ජ් ස්ටුවර්ට් සමාගම සියවස් දෙකකට ආසන්න කාලයක් පුරා ලෝක යුද්ධ, සිවිල් යුද්ධ, ත්‍රස්තවාදී, කැරලි, සුනාමි, වසංගත, සමාජ, දේශපාලන සහ ආර්ථික වෙනස්කම් ආදී දේශීය මෙන්ම ගෝලීය තත්ත්වයන්ටද මුහුණ දී ඇත. මෙයට අමතරව මෙම ආයතනයටම අනන්‍ය වූ විශේෂ අභියෝගයන්ට ද මුහුණදීමට සිදුවිය. 1870 වසරේදී ශ්‍රී ලංකාවේ කෝපි වගාව දිලීර රෝගයකින් විනාශ විය. මෙයින් කෝපි වගාවේ ඇතිවූ පසුබැසීම හේතුවෙන් ශ්‍රී ලාංකික කෝපි වගාව, තේ වගාවට පරිවර්තනය කිරීමට මෙම සමාගම පෙරමුණ ගත් අතර, එයින් “ශ්‍රී ලාංකාවේ තේ කර්මාන්තයේ පුරෝගාමීන්” යන කීර්තිමත් නාමය ද දිනා ගැනීමට සමත් විය. මෙයින් සියවසකට පමණ පසුව රජය මඟින් 1975 වසරේදී වතු ජනසතු කිරීම තුළින් ආයතනය වෙත විශාල බලපෑමක් සිදුවිය. මේ කාලය වන විට සමාගමට එහි නියෝජිත ආයතනය විසින් කළමනාකරණය කරනු ලැබූ තේ වතු විශාල ප්‍රමාණයක් තිබූ අතර, එය එහි ප්‍රධානම ව්‍යාපාරික ආදායම් මාර්ගය බවට පත්ව තිබුණි. මෙහි ප්‍රතිඵලයක් ලෙස ජෝර්ජ් ස්ටුවර්ට් සමාගම, ක්‍රමානුකූලව නව ව්‍යාපාරික ඉසව් ඔස්සේ විවිධාංගීකරණයට යොමුවිය. 1996 වසරේ ජනවාරි මස ශ්‍රී ලංකා මහ බැංකුව ඉලක්ක කර ගනිමින් එල්ල කරනු ලැබූ ත්‍රස්තවාදී බෝම්බ ප්‍රහාර‌යේදී ජනාධිපති මාවතේ පිහිටි සමාගමේ සංකේතාත්මක විටිනාකමකින් යුතු ප්‍රධාන කාර්යාලය විනාශයට පත්විම විශාල බලපෑමක් ඇති කළේය. දේපළ හානියට අමතරව හද කම්පාවට පත්කරමින් ජීවිත හානිද සිදුවිය. මෙවැනි අර්බුදකාරී වතාවරණයක තාවකාලික කාර්යාල වල සිට අඛණ්ඩව මෙහෙයුම් කාර්යයන් දියත් කරමින්, මෙම ආයතනයේ සංචාරක අංශය මඟින් ICC ලෝක කුසලාන අවසන් මහා තරගය සඳහා විශේෂ ගුවන් වාරයක් ශ්‍රී ලංකා ගුවන් සේවය සමඟ එක්ව සංවිධානය කිරීම, එවක සමාජය තුළ ප්‍රසාදජනක මාතෘකාවක් බවට පත්විය.

වර්තමානය වන විට ශ්‍රී ලාංකික පෞද්ගලික ව්‍යාපාරික අංශයේ ආරම්භය සනිටුහන් කරනු ලබන්නේ ජෝර්ජ් ස්ටුවර්ට් සහ සමාගමයි. වසර 185ක අතීතයකට හිමිකම් කියන ශ්‍රී ලංකා වාණිජ මණ්ඩලයේ ආරම්භක සමාජිකයෙක් වන ජෝර්ජ් ස්ටුවර්ට් සමාගම සම්බන්ධයෙන් අදහස් දක්වමින් ලංකා වාණිජ මණ්ඩලයේ සභාපති දුමින්ද හුලංගමුව මහතා මෙසේ පැවසීය. “ජෝර්ජ් ස්ටුවර්ට් ආයතන වෘත්තාන්තයෙන් කියවෙනුයේ, ශ්‍රී ලංකාවේ යටත් විජිත සමයේ ව්‍යාපාර, වර්තමාන ශ්‍රී ලංකාවේ පෞද්ගලික ආයතන දක්වා පරිණාමය සිදුවූ ආකාරය යි. එම ආයතනයේ මෙම වසර 190ක ගමන, ශ්‍රී ලංකාවේ පෞද්ගලික ක්ෂේත්‍රයේ ශක්තිය, නම්‍යශීලිත්වය සහ අනුවර්තනය වීමේ හැකියාවට මනා සාක්ෂි සපයයි.”

ජෝර්ජ් ස්ටුවර්ට් සමූහයේ 38වෙනි සභාපති ලෙස කටයුතු කරන සර්ව අමරසේකර මහතා මෙහිදී අදහස් දක්වමින්, “ජෝර්ජ් ස්ටුවර්ට් යනු, හුදෙක් පුද්ගලයෙක්, ස්ථානයක් හෝ කාලනිර්ණයක් නොවන අතර, එය සැම අභිබවා ගිය සර්වකාලීන වන ගමනකි. එය සැබැවින්ම නිර්මාතෘත්වයේ සිටම පරම්පරාවෙන් පරම්පරාවට දායාද වූ සාර්ධර්ම සමුදායකි. ජෝර්ජ් ස්ටුවර්ට් හි අපි දරන්නාවූ සෑම ප්‍රයත්නයක්ම දේශයේ පුද්ගලික අංශයේ සාර්ථකත්වය කෙරෙහිද, අන්තර්ජාතික ව්‍යාප්තිය දක්වාද දිගුවන ගමනකට කැපවී සිටින්නෙමු. වර්තමානයේදී අපගේ දේශීය ආදායම සහ අපනයන ආදායම 50:50ක අනුපාතයකට පවත්වාගෙන යන අතර, ඉන් 95%ක පමණ ආදායමක් හිමිකරගනු ලබන්නේ පෞද්ගලික අංශයෙනි. වසර 200ක පෞඪ ඉතිහාසයකට හිමිකම් කියන දශකයකට පිවිසෙන අප ආයතනය, අපනයන ආදායම් වර්ධනය කර ගනිමින්, අන්තර්ජාතික ව්‍යාප්තිය තවදුරටත් පුළුල් කිරීමට අරමුණු කර ඇත.”