අධිකරණ නිලධාරීන්ගේ ආරක්ෂාව සඳහා පවරා ඇති පොලිස් නිලධාරීන් අනිසි ලෙස භාවිත කිරීම සහ හිරිහැර කිරීම සම්බන්ධයෙන් ලැබී ඇති නිර්නාමික පෙත්සමක අන්තර්ගතය අධිකරණ සේවා කොමිෂන් සභාව (JSC) විසින් විනිසුරුවරුන් සහ අධිකරණ නිලධාරීන්ගේ අවධානයට යොමුකර තිබේ.

නිර්නාමික පෙත්සම සළකා බැලීමෙන් පසු, අධිකරණ සේවා කොමිසම විසින් ‘විනිසුරුවරුන්ගේ ආරක්ෂාව’ යන මාතෘකාව යටතේ ලිපියක් විනිසුරුවරුන් වෙත යොමුකර ඇත.

වාර්තා වන පරිදි අදාළ පෙත්සම ජනාධිපති ලේකම් කාර්යාලයට ද යවා තිබේ.

නව රජය බලයට පත්වීමෙන් පසු රාජ්‍ය නිලධාරීන් අනිසි ලෙස භාවිත කිරීම සම්පූර්ණයෙන්ම නතර කර ඇති බවත්, පොලිසිය මහජනතාවට සේවය කිරීමේ ඔවුන්ගේ මූලික රාජකාරියේ නිරත වන බව සහතික කිරීමට පියවර ගෙන ඇති බවත් අධිකරණ සේවා කොමිසමේ නිවේදනය පෙන්වා දෙයි.

විනිසුරුවරුන් සහ අධිකරණ නිලධාරීන් වෙත යොමු කරන ලද ලිපියේ ඇතැම් කරුණු ඉදිරිපත්ව තිබෙන චෝදනාවන්ට සම්බන්ධය.

“ඇතැමුන් තමන්ට පවරා ඇති ආරක්ෂක නිලධාරීන් භාවිත කරන්නේ තමන්ගේ සහායට, වට්ටම් මිලට භාණ්ඩ ලබා ගැනීමට, ඔවුන්ගේ නිවෙස්වල වෙනත් විවිධ වැඩ සඳහා සහ බීමත් වූ විට නැවත නිවසට යෑමට උදව් ලබා ගැනීමට,” යනුවෙන් නිවේදනයේ සඳහන් විය.

අධිකරණ පරිශ්‍රවල ආරක්ෂාව සඳහා සිටින පොලිස් නිලධාරීන් ඔවුන්ගේ ආරක්ෂකයන් ලෙස භාවිත කරන බවත්, කාර්යාලවල සහ ඔවුන්ගේ නිවෙස්වල සිටියදී ඔවුන් පෞද්ගලික වැඩ සඳහා යොදා ගන්නා බවත් එහි සඳහන් වේ.

මෙයට ලිපිකරු කාර්ය මණ්ඩලය සහ ඔවුන් සතුව ඇති අනෙකුත් කාර්ය මණ්ඩල සාමාජිකයන් නිසි ලෙස කළමනාකරණය කිරීම වෙනුවට සිතාසි සහ වරෙන්තු නිකුත් කිරීමට සහ නඩු ලියාපදිංචි කිරීමට බල කිරීම ද ඇතුළත් වේ.

විනිසුරුවරුන්ට ලබා දී ඇති පොලිස් යතුරුපැදි ආරක්ෂාව සම්බන්ධයෙන් ද ප්‍රශ්න මතු වී තිබේ.

“විනිසුරුවරුන්ට නියමිත වේලාවට අධිකරණයට යෑමට නම්, ඔවුන් ඉක්මණින් තම නිවෙස්වලින් පිටවිය යුතු බව පෙන්වා දී ඇත. ජනාධිපතිවරයා හෝ අගමැති ආරක්ෂක වාහන භාවිත නොකරන අවස්ථාවක, මෙය සොයා බැලිය යුතු කාරණයක්,” යනුවෙන් නිවේදනයේ සඳහන් වේ.

විනිසුරුවරුන්ට එරෙහි අනෙක් චෝදනාව නම්, ඔවුන්ගේ නිවෙස්වල ආරක්ෂාව සඳහා යොදවා සිටින සිව්දෙනෙකුගෙන් යුත් පොලිස් නිලධාරීන්ව සමහර විනිසුරුවරුන් ඔවුන් නොමැති විට ඔවුන්ගේ පෞද්ගලික නිවාසවලට ආරක්ෂාව සැපයීම සඳහා යොදා ගැනීමයි.

විනිසුරුවරුන්ට පොලිස් නිලධාරීන් ලබා දී නොමැති අවස්ථාවන්හිදී, අදාළ ප්‍රදේශවල ස්ථානාධිපතිවරුන් සහ අනෙකුත් ජ්‍යෙෂ්ඨ පොලිස් නිලධාරීන් විනිසුරුවරුන් විසින් කැඳවා දොස් පවරා ඇත.

විනිසුරු සරත් අඹේපිටිය ඝාතනයෙන් පසුව විනිසුරුවරුන්ට පොලිස් ආරක්ෂාව ලබා දීමේ තීරණය ගනු ලැබූ නමුත් එවැනි එක් සිදුවීමක් භාවිත කර මෙතරම් විශාල පොලිස් නිලධාරීන් පිරිසක් අනිසි ලෙස භාවිත කිරීම සමාලෝචනය කළ යුතු බව අධිකරණ සේවා කොමිසමේ නිවේදනයේ වැඩිදුරටත් සඳහන් වේ.

නිර්නාමික පෙත්සමේ, නීතිපති දෙපාර්තමේන්තුවේ නිලධාරීන් කිහිප දෙනෙකුට එරෙහිව ද චෝදනා තිබේ.

අදාළ නොවන වැඩ පිළිබඳ සාකච්ඡා සඳහා ජ්‍යෙෂ්ඨ පොලිස් නිලධාරීන් කැඳවීමේ පුරුද්දක් ඇති කර ගෙන ඇති බව එහි සඳහන් වේ.

සමහර රජයේ නීතිඥවරුන් පොලිස් නිලධාරීන්ගේ සේවය ලබාගෙන ඇති බවත්, ඔවුන් සම්බන්ධීකරණ ලේකම්වරුන් ලෙස යොදාගෙන ඔවුන් ලවා කාර්යාලවල වැඩ කරවාගෙන ඇති බවටත් චෝදනා එල්ල වේ.