January 21, 2025
ජනාධිපති බංගලා සහ අමාත්‍ය නිවාස පෞද්ගලික අංශයට බදුදීමට රජය ගත් තීරණය හේතුවෙන්, මෙම ගොඩනැගිලිවල ඓතිහාසික වටිනාකමට හානියක් සිදුවේදැයි යන්න පිළිබඳව ඇතැම් පාර්ශව කනස්සල්ල පළකර ඇත.
පෞද්ගලික සංවර්ධකයන්ට කුමන දේපළ පැවරිය යුතුද යන්න ඇගයීම සඳහා කමිටුවක් පත්කර ඇති බව රජය පවසන නමුත්, එවැනි පියවරක් කෙතරම් ඥාණවන්තද යන්න පිළිබඳව ප්‍රශ්න මතු වී තිබේ.
රජයේ වටිනා දේපළ අනිසි ලෙස භාවිත කිරීමේ හැකියාව පිළිබඳව කනස්සල්ල මතුකළ අය අතර හිටපු පාර්ලිමේන්තු මන්ත්‍රී සහ විපක්ෂ දේශපාලනඥයකු වන චරිත හේරත් ද සිටී.
“මෙම යෝජනාවට ඉතා වටිනා රජයේ බංගලා ඇතුළත් වන බව පෙනේ. ඒවායින් සමහරක් ඓතිහාසික හා වාස්තු විද්‍යාත්මක වැදගත්කමක් දරයි. විශේෂයෙන්, නුවරඑළියේ ජනාධිපති මන්දිරය ද අදාළ දේපළ අතර වේ. එවැනි ක්‍රියා, විනිවිදභාවයෙන් යුතුව හසුරුවන්නේ නැත්නම්, එය පූර්වාදර්ශයක් විය හැකියි” චරිත හේරත් සිය X ගිණුමේ සටහන් කර ඇත.
මෙම යෝජනාව හොඳින් ඇගයීම සඳහා ජාතික සංවාදයක් ආරම්භ කිරීම අත්‍යවශ්‍ය බව ඔහු පවසයි.
“මෙම දේපළ පටු අවශ්‍යතා සඳහා යොදවනවාට වඩා සමස්තයක් ලෙස රටට ප්‍රයෝජනවත් වන ආකාරයෙන් සංරක්ෂණය කර කළමනාකරණය කිරීම සහතික කිරීම සඳහා ඒවායේ තාර්කිකත්වය, තේරීමේ ක්‍රියාවලිය සහ අපේක්ෂිත භාවිතය පිළිබඳව මහජනතාව දැනුවත් කළ යුතුයි”
බෙලිහුල්ඔය, පොළොන්නරුව, හබරණ සහ මාතර යන ප්‍රදේශවල පිහිටි විශ්‍රාම නිවාඩු නිකේතන වැනි වටිනා වත්කම්, එවකට පැවති ආණ්ඩු සමඟ සමීපව සම්බන්ධ වූ අයට පවරා දුන් අවස්ථා අතීතයේ දී ඇති බව ඔහු පෙන්වාදෙයි.
මෙම දේපළවලින් සමහරක් සංවර්ධනය කරන ලද අතර, අනෙක් ඒවා නොසළකා හැරීම හේතුවෙන් ඒවායේ වටිනාකම සහ පවරාදීමේ අරමුණ අහිමි විය.
