ඉහළයමින් තිබෙන සංවිධානාත්මක අපරාධ කල්ලි අතර වෙඩි තැබීම් රැල්ල මැඩපැවැත්වීමේ අරමුණින් අපරාධ මර්දන මෙහෙයුම් සඳහා සහාය වීමට කොළඹ නගරයේ පොලිස් ස්ථාන හයක විශේෂ කාර්ය බළකාය(STF) රැඳවීමට ශ්‍රී ලංකා පොලිසිය තීරණය කර ඇති බව වාර්තා වේ.

ජනවාරි 1 වැනි දින සිට මේ දක්වා රට පුරා පාතාල කල්ලි එදිරිවාදිකම් සහ කොන්ත්‍රාත් ඝාතන සම්බන්ධ සංවිධානාත්මක වෙඩි තැබීම් හතක් සිදුවී ඇති අතර, ඉන් බහුතරය වාර්තා වී ඇත්තේ කොළඹ අවටිනි.

එම වෙඩි තැබීම්වලින් පුද්ගලයන් පස් දෙනෙකු මිය ගොස් තිබිණි.

මේ වසරේ පළමු සංවිධානාත්මක පාතාල කල්ලි සම්බන්ධ වෙඩි තැබීම වැලිගමින් වාර්තා වූ අතර, තවත් වෙඩි තැබීම් දෙකක් අත්තිඩිය – බඩෝවිටින් සහ ගල්කිස්ස, කොහුවල සහ මන්නාරමෙන් වාර්තා වී තිබිණි.

මෙම සංවිධානාත්මක වෙඩි තැබීම් මැඩපැවැත්වීම සඳහා සහාය අවශ්‍ය බව හඳුනාගෙන ඇති පොලිස් ස්ථාන හයකට විශේෂ කාර්ය බළකායේ කණ්ඩායම් යෙදවීමට තීරණය කර ඇති බව වාර්තා වේ.

සාමාන්‍යයෙන්, විශේෂ කාර්ය බළකාය කොළඹ සහ ඉන් පිටත ඔවුන්ගේ අදාළ කඳවුරුවල ස්ථානගතව සිටින අතර අවශ්‍ය විටෙක ඔවුන්ගේ සේවාවන් ඕනෑම හදිසි අවස්ථාවක් සඳහා කැඳවනු ලැබේ.

කෙසේවෙතත්, සාමාන්‍ය පොලිස් ස්ථානවලට විශේෂ කාර්ය බළකාය යොදවනු ලබන පළමු අවස්ථාව මෙය වනු ඇති බව ද වාර්තා වේ.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග පවසන්නේ මෙම සංවිධානාත්මක වෙඩි තැබීම් කෙරෙහි ඔවුන් බරපතළ අවධානයක් යොමු කර ඇති බවයි.

පොලිස් විශේෂ කාර්ය බළකාය යෙදවීමට අමතරව අපරාධ සිතියම ඉතා ක්‍රියාකාරී බව පෙන්නුම් කරන ප්‍රදේශවල දිවා රාත්‍රී හදිසි මාර්ග බාධක ස්ථාපිත කර ජංගම මුර සංචාර වැඩි කරන බව ද ඔහු සඳහන් කරයි.

මෙම වෙඩි තැබීම් ප්‍රධාන වශයෙන් සිදුවන්නේ මත්ද්‍රව්‍ය ව්‍යාපාරය සම්බන්ධයෙන් සංවිධානාත්මක සන්නද්ධ කල්ලි අතර පවතින දිගුකාලීන එදිරිවාදිකම්වල ප්‍රතිඵලයක් ලෙස බවත්, එමගින් මහජනතාවගේ ජීවිත අවදානමට ලක්ව ඇති බව සිතිය නොහැකි බවත් ඔහු සඳහන් කර තිබේ.

මෙම සිද්ධි, සාමාන්‍ය ජනතාව වෙඩි තැබීම්වලට සම්බන්ධ වන ‘චිකාගෝ’වට සමාන නැති බවත් මෙම වෙඩි තැබීම්වලට සම්බන්ධ වන්නේ සංවිධානාත්මක කල්ලිවල සාමාජිකයන් බවත් ඔහු සඳහන් කර තිබේ.