පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පත පාර්ලිමේන්තුවෙන් සම්මත කළහොත්, අප්‍රේල් 14 වැනි දිනට යෙදී ඇති අලුත් අවුරුද්දට පෙර පළාත් පාලන මැතිවරණය පැවැත්වීමට හැකි වනු ඇතැයි මැතිවරණ කොමිසමේ සභාපති ආර්.එම්.ඒ.එල්. රත්නායක පවසයි.

මෙම මස මුලදී පාර්ලිමේන්තුවට ඉදිරිපත් කරන ලද මෙම පනත් කෙටුම්පත මගින් නව නාමයෝජනා කැඳවීමට සහ මැතිවරණ පැවැත්වීමට ප්‍රතිපාදන සලසයි.

2023 මැතිවරණය සඳහා ඉදිරිපත් කරන ලද පෙර නාමයෝජනා අවලංගු කිරීමට ද එමගින් ඉඩ සැලසේ.

පළාත් පාලන ආයතන 340ක් සඳහා ඡන්ද විමසීම පැවැත්වීමට සිදුවන බැවින්, ඒ සඳහා රුපියල් බිලියන 8ත් 10ත් අතර මුදලක් අවශ්‍ය වනු ඇතැයි මැතිවරණ කොමිසම ඇස්තමේන්තු කර ඇති බව රත්නායක සඳහන් කරයි.

පළාත් පාලන ආයතන 340 සඳහාම මැතිවරණ පත්‍රිකා මුද්‍රණය කිරීමට සිදුවන බවත් මෙය ‘වැඩ ගොඩක්’ බවත් ඔහු පෙන්වාදෙයි.

මැතිවරණය සඳහා අවශ්‍ය ඇතැම් ද්‍රව්‍ය මුද්‍රණය කිරීම ආරම්භ කිරීමේ අරමුණින් කොමිසම දැනටමත් රජයේ මුද්‍රණාලය සමඟ සාකච්ඡා පවත්වා ඇති අතර එය කලින් කළ හැකි බව ද ඔහු අනාවරණ කරයි.

ඉදිරි මැතිවරණවලදී 2024 ඡන්ද හිමි නාමලේඛනයට අතිරේක ඡන්ද හිමි නාමලේඛනයක් ද එක් කෙරේ.

මෙමගින් නව ඡන්දදායකයන් 78,000ක් පමණ ඡන්දය ප්‍රකාශ කිරීමට සුදුසුකම් ලබනු ඇත.

මේ අතර, මුදල් අමාත්‍යාංශයේ ආරංචි මාර්ග පවසන්නේ පළාත් පාලන මැතිවරණය සඳහා අරමුදල් සැපයීමේ ප්‍රමාදයක් සිදු නොවනු ඇති බවයි.

2025 වසරේ එළඹෙන අයවැය මඟින් මැතිවරණ සඳහා අරමුදල් වෙන් කරනු ඇති බව ද වාර්තා වේ.