අභියාචනාධිකරණ සභාපති නිශ්ශංක බන්දුල කරුණාරත්න සිය විශ්‍රාම ගැනීමේ ලිපි ලේඛන ඉකුත් සතියේ ජනාධිපති අනුර කුමාර දිසානායක වෙත ඉදිරිපත් කිරීමෙන් පසු, රජය විසින් ඔහුට එරෙහිව ගෙන ඒමට සැලසුම් කළ දෝෂාභියෝගය ඉදිරිපත් කිරීමේ ක්‍රියාමාර්ගය අත්හිටුවා තිබේ.

විනිසුරු කරුණාරත්න පෙබරවාරි 1 වැනි දින සිට බලපැවැත්වෙන පරිදි අභියාචනාධිකරණ රාජකාරිවලින් ඉවත් වීමට නියමිත අතර, මෙම තීරණය ජනාධිපතිවරයාට දැනටමත් දැනුම් දී ඇති බව වාර්තා වේ.

ඔහු වයස අවුරුදු 63 සම්පූර්ණ වීමෙන් පසු ජුනි 16 වැනි දින විශ්‍රාම යෑමට නියමිතය.

විශ්‍රාම යෑමට සූදානම් වීම සහ රාජකාරිවලින් ඉවත් වීමට ගත් තීරණය සැළකිල්ලට ගෙන, විනිසුරු කරුණාරත්නට දෝෂාභියෝගයක් ඉදිරිපත් කිරීමේ සැලසුම් අත්හිටුවීමට තීරණය කර ඇති බව රජයේ ආරංචි මාර්ග පවසයි.

ඒ අනුව, ඔහු නිල වශයෙන් විශ්‍රාම යන වයසට පැමිණි පසු ජුනි 16 වැනි දින විශ්‍රාම යෑමට ඔහුට අවසර දෙනු ලැබේ.

පෙබරවාරි 1 වැනි දින සිට ක්‍රියාත්මක වන පරිදි රාජකාරිවලින් ඉවත් වීමට ගත් තීරණය පිළිබඳ විනිසුරු කරුණාරත්න දැනටමත් අභියාචනාධිකරණයේ සියලුම විනිසුරුවරුන්ට දැනුම් දී ඇත.

විනිසුරු කරුණාරත්න විශ්‍රාම යන තෙක් වැඩ බැලීම සඳහා අභියාචනාධිකරණයට සභාපතිවරයකු ලෙස සේවය කිරීම වෙනුවෙන් තවත් ජ්‍යෙෂ්ඨ අභියාචනාධිකරණ විනිසුරුවරයකු පත් කිරීම කෙරෙහි රජයේ අවධානය යොමු වී තිබේ.

විනිසුරු කරුණාරත්නගෙන් පසු අභියාචනාධිකරණයේ ජ්‍යෙෂ්ඨතම විනිසුරුවරයා වන්නේ විනිසුරු මොහොමඩ් ලෆාර් ය.

ජනාධිපති දිසානායක ඔහුගේ නම ශ්‍රේෂ්ඨාධිකරණයට නිර්දේශ නොකළ අතර, ඔහු ජුනි 18 වැනි දින වයස අවුරුදු 63 සම්පූර්ණ කිරීමෙන් පසු විශ්‍රාම යෑමට නියමිතය.

උදය කරලියද්දේ, රත්නප්‍රිය ගුරුසිංහ සහ ධම්මික ගනේපොල යන විනිසුරුවරුන් ඊළඟට සිටින ජ්‍යෙෂ්ඨතම අභියාචනාධිකරණ විනිසුරුවරුන් වේ.

ව්‍යවස්ථාදායක සභාවේ අනුමැතියට යටත්ව පත් කරන ලද ඕනෑම පුද්ගලයකුගේ හැසිරීම සම්බන්ධයෙන් පරීක්ෂණයක් ආරම්භ කිරීමට ආණ්ඩුක්‍රම ව්‍යවස්ථා සභාවට බලය ඇති බව ද රජය අවධාරණය කර ඇත.

මේ අතර, අලුතින් පත් කරන ලද ශ්‍රේෂ්ඨාධිකරණ විනිසුරුවරුන් සිව්දෙනා පිළිගැනීමේ උත්සව සභාව බදාදා ශ්‍රේෂ්ඨාධිකරණ සංකීර්ණයේ ප්‍රධාන ශාලාවේදී පැවැත්වේ.

සෝභිත රාජකරුණා, මේනකා විජේසුන්දර, සම්පත් අබේකෝන් සහ සම්පත් විජේරත්න යන විනිසුරුවරුන් පසුගිය සතියේ නව ශ්‍රේෂ්ඨාධිකරණ විනිසුරුවරුන් ලෙස ජනාධිපති දිසානායක ඉදිරියේ දිවුරුම් දුන්හ.

අභියාචනාධිකරණ විනිසුරුවරුන් වන සරත් දිසානායක සහ ප්‍රදීප් හෙට්ටිආරච්චි පිළිගැනීමේ උත්සව සභාව අඟහරුවාදා අභියාචනාධිකරණ ප්‍රධාන ශාලාවේදී පැවැත්වේ.

ශ්‍රේෂ්ඨාධිකරණයේ මෑත කාලීන පුරප්පාඩු පිරවීමේදී නීතිපති දෙපාර්තමේන්තුවේ නාමයෝජනා නොසළකා හැරීමට රජය ගත් පියවර නීතිපති දෙපාර්තමේන්තුවේ ශ්‍රේණි තුළ නොසතුටක් ඇති කර ඇති බව ද දැනගන්නට තිබේ.

ශ්‍රේෂ්ඨාධිකරණයේ පුරප්පාඩුවලින් එකක් පිරවීම සඳහා නීතිපතිවරයා අතිරේක සොලිසිටර් ජනරාල් සුසන්ත බාලපටබැඳිගේ නම නම් කර තිබුණද, ජනාධිපතිවරයා විසින් ඔහුගේ නම සළකා බැලීම සඳහා ආණ්ඩුක්‍රම ව්‍යවස්ථා සභාවට යොමු කර නොතිබිණි.

අභියාචනාධිකරණයට ඊළඟට පත් කිරීමට නියමිත ජ්‍යෙෂ්ඨතම මහාධිකරණ විනිසුරුවරයා වන්නේ යාපනය මහාධිකරණ විනිසුරු එම්. ඉලංචේලියන්ය.

කෙසේවෙතත්, ඔහු අද (19) වයස අවුරුදු 60 සම්පූර්ණ කිරීමෙන් පසු විශ්‍රාම යෑමට නියමිතය.

ජ්‍යෙෂ්ඨත්වය අනුව, මහනුවර මහාධිකරණ විනිසුරු සුමුදු ප්‍රේමචන්ද්‍ර, කොළඹ මහාධිකරණ විනිසුරු නාමල් බණ්ඩාර බලල්ලේ සහ කේ. ප්‍රියන්ත ප්‍රනාන්දු සහ ත්‍රිකුණාමලය මහාධිකරණ විනිසුරු කේ. ප්‍රේම ශංකර් පිරිස ඊළඟට සිටිති.

අභියාචනාධිකරණ විනිසුරුවරුන් ලෙස සළකා බැලීම සඳහා ආණ්ඩුක්‍රම ව්‍යවස්ථා සභාවට යොමු කිරීමට ජ්‍යෙෂ්ඨ නියෝජ්‍ය සොලිසිටර් ජනරාල් ලක්මාලි කරුණානායක සහ ජ්‍යෙෂ්ඨ නියෝජ්‍ය සොලිසිටර් ජනරාල් සුදර්ශන ද සිල්වාගේ නම් ද නීතිපතිවරයා විසින් ජනාධිපතිවරයා වෙත යවා ඇත.

මෙම වසරේ ඉහළ අධිකරණවල තවත් විනිසුරුවරුන් කිහිප දෙනෙකු විශ්‍රාම යෑමට නියමිතය.

ශ්‍රේෂ්ඨාධිකරණයේ, අගවිනිසුරු මුර්දු ප්‍රනාන්දු ජූලි මාසයේදී විශ්‍රාම යෑමට නියමිත අතර විනිසුරු ගාමිණී අමරසේකර ජුනි මාසයේදී විශ්‍රාම යෑමට නියමිතය.

අභියාචනාධිකරණ සභාපති නිශ්ශංක බන්දුල කරුණාරත්න සහ විනිසුරු මොහොමඩ් ලෆාර් ජුනි මාසයේදී විශ්‍රාම යන අතර විනිසුරු අහ්සාන් මරිකාර් අප්‍රේල් මාසයේදී ඔවුන්ට පෙර විශ්‍රාම යනු ඇත.