බදු නිෂ්කාශන සහතිකයක් නොමැතිව වුවද 2025 සඳහා මත්පැන් අලෙවි බලපත්‍ර අලුත් කිරීමට සුරාබදු දෙපාර්තමේන්තුව තීරණය කර ඇති බව වාර්තා වේ.

මත්පැන් අලෙවි කිරීම සඳහා බලපත්‍ර නිකුත් කිරීමට සහ බලපත්‍ර අලුත් කිරීමට මෙරට බලය ඇත්තේ සුරාබදු දෙපාර්තමේන්තුවට පමණි.

2025 වසර වෙනුවෙන් මත්පැන් අලෙවි කරන ස්ථාන 4,500කට අධික සංඛ්‍යාවක් සඳහා බලපත්‍ර අලුත් කිරීමට පසුගිය දෙසැම්බර් 31 වැනි දිනට පෙර බදු නිෂ්කාශන සහතික නිකුත් කරන ලෙස පසුගිය වසරේ දෙසැම්බර් මස මුලදී සුරාබදු දෙපාර්තමේන්තුව විසින් දේශීය ආදායම් දෙපාර්තමේන්තුව වෙත ලිඛිත ඉල්ලීමක් සිදුකර තිබිණි.

සුරාබදු ආඥා පනත යටතේ මත්පැන් බලපත්‍රයක් අලුත් කිරීම සඳහා බදු නිෂ්කාශන සහතිකය කිසි විටෙකත් අනිවාර්ය ලියවිල්ලක් නොවේ.

එහෙත් මත්පැන් අලෙවිකරුවන් නියමිත වේලාවට ඔවුන්ගේ නියමිත ආදායම් බදු ගෙවීම නියාමනය කිරීම සඳහා මෙම සම්ප්‍රදායික පිළිවෙත අනුගමනය කර ඇත.

වාර්තා වන පරිදි ජනවාරි 15 ​​වැනි දිනට පෙර බදු නිෂ්කාශන සහතික නිකුත් කිරීම සඳහා මේ මස මුලදී සුරාබදු දෙපාර්තමේන්තුව දේශීය ආදායම් දෙපාර්තමේන්තුව වෙත දෙවැනි ලිඛිත මතක් කිරීම ද යොමුකර තිබී ඇත.

ඊයේ වන විටත් ඉල්ලීම ඉටු නොවූ බැවින්, බදු නිෂ්කාශන සහතික තවදුරටත් සළකා බැලීමකින් තොරව මත්පැන් බලපත්‍රය අලුත් කිරීමට සුරාබදු දෙපාර්තමේන්තුව තීරණය කර ඇති බව වාර්තා වේ.

බලපත්‍ර අලුත් නොකිරීම මත වසා දමා ඇති අලෙවිසැල් හේතුවෙන් 2025 දී අලෙවිය පහත වැටීමට ඉඩ දිය නොහැකි බවත්, එමඟින් රාජ්‍යයට ආදායමක් අහිමි වන බවත් සුරාබදු දෙපාර්තමේන්තුවේ අදහස වී තිබේ.

මත්පැන් වෙළඳසැල් සහ බාර්, අවන්හල් සහ හෝටල් වැනි මත්පැන් පරිභෝජනය කරන ස්ථාන ඇතුළුව රටේ මුළු මත්පැන් බලපත්‍ර 4,500කට අධික සංඛ්‍යාවකින් මේ වන විට 3,500ක් අලුත් කර ඇති බව වාර්තා වේ.

මේ අතර, ශ්‍රී ලංකා මත්පැන් බලපත්‍රලාභීන්ගේ සංගමයට අනුව එම සංගමයේ ලියාපදිංචි වී ඇති බලපත්‍රලාභී සිල්ලර මත්පැන් වෙළෙන්දන් 1,500ක් පමණ අතරින් සාමාජිකයන් 200ක් පමණක් බදු නිෂ්කාශන සහතිකය ලබාගෙන ඇත.