අමෙරිකාවේ ලොස් ඇන්ජලීස් හි විනාශකාරී ලැව්ගිනි අතරතුර මැලිබු ප්‍රදේශයේ නිවාස තුළ ඇති දෑ සොරකම් කරමින් ගිනි නිවන භටයෙකු ලෙස සැරසී සිටි පුද්ගලයකු නිලධාරීන් විසින් අත්අඩංගුවට ගෙන ඇති බව ෆොක්ස් නිව්ස් වාර්තා කර තිබේ.

ජනමාධ්‍ය හමුවකදී අදහස් දක්වමින් ලොස් ඇන්ජලීස් ප්‍රාන්ත ෂෙරිෆ් දෙපාර්තමේන්තුවේ ෂෙරිෆ් රොබට් ලූනා සැකකරු අත්අඩංගුවට ගැනීම තහවුරු කළේය.

එහිදී ඔහු කියාසිටියේ ගිනි නිවන භටයෙකු යැයි ඔහු ද කොල්ලකරුට රැවටුණු බවයි.

“මම මැලිබු ප්‍රදේශයේ සිටින විට, ගිනි නිවන භටයෙකු ලෙස සැරසී සිටි පුද්ගලයෙකු දුටුවා. මම ඔහුගෙන් ඇහුවා ඔහු වාඩි වී සිටි නිසා ඔහු හොඳින්ද කියා. නිලධාරීන් ඔහුට මාංචු දමා ඇති බව ඔහු දුටුසැනින් මට තේරුණේ නැහැ, ”ලූනා වාර්තාකරුවන්ට පැවසීය.

ලූනාට අනුව, ලොස් ඇන්ජලීස් ප්‍රදේශයේ ලැව්ගිනි සම්බන්ධයෙන් පුද්ගලයින් 29 දෙනෙකු පමණ අත්අඩංගුවට ගෙන ඇත.

නගරයේ ඇඳිරි නීතිය කඩකිරීම සම්බන්ධයෙන් සෙනසුරාදා රාත්‍රියේ එක් පුද්ගලයෙකු අත්අඩංගුවට ගෙන ඇති අතර තවත් තිදෙනෙකු අත්අඩංගුවට ගෙන ඇත්තේ, සොරකම් කිරීමේ සිද්ධියක් සම්බන්ධයෙන් බව පැවසේ.

පොලිසිය අනතුරු ඇඟවූයේ දේශීය වේලාවෙන් සවස 6 සිට උදේ 6 දක්වා පැනවූ ඇඳිරිනීතිය ඉරිදා රාත්‍රියේ සිට සඳුදා දක්වා ක්‍රියාත්මක වන බවයි.

මේ අතර ලොසැන්ජලීස් හි ලැව් ගිනි හේතුවෙන් මියගිය පුද්ගලයින් ගණන 24 දක්වා ඉහළ ගොස් තිබේ.

මියගිය අයගෙන් 8 දෙනෙකු Palisades කලාපයෙන් සහ 16 දෙනෙක් Eaton Fire කලාපයේ බව සඳහන් වේ.

මේ අතර ලොස් ඇන්ජලීස් හි වඩාත් සුවිශේෂී අසල්වැසි ප්‍රදේශවල නිවාසවලට තර්ජනය කරමින් ලැව්ගිනි පැතිර යද්දී, ප්‍රාන්තයේ ධනවත් පුද්ගලයන් සිය දේපළ සහ නිවාස ආරක්ෂා කර ගැනීම සඳහා පෞද්ගලික ගිනි නිවීමේ සේවා වෙත යොමුවෙමින් සිටින බව වාර්තා වේ.

එය අධික අය කිරීමක් සමඟ ලබාදෙන සුඛෝපභෝගී සේවාවකි.

පොදු ගිනි නිවන දෙපාර්තමේන්තුවේ කාර්යභාරය ධාරිතාව ඉක්මවා යෑමත් සමග, නගරයේ සමහර ධනවතුන් සිය නිවාස සහ දේපළ ආරක්ෂා කර ගැනීමට මෙලෙස පෞද්ගලික ගිනි නිවීමේ සේවා සඳහා පැයකට ඩොලර් 2,000 ක පමණ මුදලක් ගෙවන බව වාර්තා වේ.