ශ්‍රී ලංකාවේ උතුරෙන් ඔබ්බට මුහුදේ කැස්බෑවන් 100 කට වැඩි සංඛ්‍යාවක් මියගොස් සිටීම ධීවරයින්ගේ සහ පරිසරවේදීන්ගේ කනස්සල්ලට හේතු වී තිබේ.

ශ්‍රී ලංකා මුහුදු සීමාවට ඇතුළු වන ඉන්දීය දඩයම්කරුවන් විසින් තහනම් ධීවර ආම්පන්න භාවිත කිරීම හේතුවෙන් මෙම සත්වයන් මියගොස් ඇති බවට සැකකෙරේ.

යාපනයේ කෂුරිනා, කෝවලන් සහ කරෙයිනගර් වෙරළ තීරයේ කැස්බෑවන් සිය ගණනකගේ මළසිරුරු හමු වූ බව ඔවුහු පෙන්වාදෙති.

ඒ අතර තුවාල ලැබූ කැස්බෑවන් කිහිපදෙනකු දුටු බවද ඔවුහු පවසති.

මේ අතර වෙරළ තීරයේ තිබී හමු වූ සජීවී කැස්බෑවන් නාවික හමුදාව සහ ධීවරයින් විසින් මුහුදට මුදාහැර තිබේ.

ඉන්දීය නීතිවිරෝධී ධීවරයන්ගේ ක්‍රියාකාරකම් හේතුවෙන් උතුරෙන් ඔබ්බට මුහුදේ කැස්බෑ ගහණය වඳවීමේ තර්ජනයට මුහුණ දී සිටින බව ධීවරයෝ පවසති.

මේ සම්බන්ධයෙන් අදාළ බලධාරීන්ගේ උදාසීන ආකල්පය පිළිබඳව ඔවුහු කනස්සල්ල පළකරති.