අන්තර්ජාතික ක්‍රිකට් කාලසටහන්වල පවතින පැහැදිලි අසමානතා ආමන්ත්‍රණය කරන ලෙස ශ්‍රී ලංකා ක්‍රිකට් හිටපු නායක ඇන්ජලෝ මැතිව්ස් අන්තර්ජාතික ක්‍රිකට් කවුන්සිලයෙන් ඉල්ලීමක් කර තිබේ.

ඔහු මෙම අභියාචනය සිදුකරන්නේ ශ්‍රී ලංකාව සඳහා ටෙස්ට් තරග දැඩි ලෙස අඩු වී ටෙස්ට් ආකෘතියේ පැවැත්මට දැඩි තර්ජනයක් වී ඇති පසුබිමකය.

ශ්‍රී ලංකාවට ටෙස්ට් කාලසටහන යටතේ ඇත්තේ 2025 දී තරඟ හතරක් සහ 2026 දී තරඟ හයක් පමණි.

මෙම අවස්ථා අඩුවීම මගින් පෙන්නුම් කරන්නේ කෙටි, වඩා වාණිජමය වශයෙන් ලාභදායී ආකෘති සඳහා ටෙස්ට් ක්‍රිකට් පසෙක තබා ඇති බවය.

ශ්‍රී ලංකා ක්‍රිකට් ක්‍රීඩාවේ ප්‍රබලයකු වන මැතිව්ස්, ක්‍රීඩාවේ උරුමය සඳහා ටෙස්ට් ක්‍රිකට් ක්‍රීඩාවේ වැදගත්කම අවධාරණය කරමින් තම කලකිරීම ප්‍රකාශ කර තිබේ.

ශ්‍රී ලංකාව 2025 ආරම්භ කරන්නේ ඕස්ට්‍රේලියාවට එරෙහි ටෙස්ට් තරඟ දෙකකින් සමන්විත තරඟාවලියකින් වන අතර, දැනට පවතින ලෝක ටෙස්ට් ශූරතා වටයේ අවසන් තරඟයට පැමිණීම වෙනුවෙන් එය තීරණාත්මක වේ.

බංග්ලාදේශයට එරෙහිව තවත් ටෙස්ට් තරඟ දෙකකින් සමන්විත තරඟාවලිය පැවැත්වෙන්නේ තවත් මාස පහකට පසුවය.

ඉන්පසුව, 2026 මැද භාගය වන තෙක් ශ්‍රී ලංකාවට ටෙස්ට් තරඟ නැත.

කණ්ඩායමට සහ ක්‍රීඩකයන්ගේ වර්ධනයට බාධාවක් වන පරතරයකි.

2026 දී ද ශ්‍රී ලංකාවට ඇත්තේ තරගමාලා තුනක් පමණි.

ඒ, ජුනි මාසයේදී බටහිර ඉන්දීය කොදෙව්වන්ට එරෙහිව, අගෝස්තු මාසයේදී ඉන්දියාවට සහ ඔක්තෝබර් සහ නොවැම්බර් මාසයේදී පාකිස්ථානයට එරෙහිව ටෙස්ට් තරග දෙක බැගින් වශයෙනි.

37 වැනි වියේ පසුවන මැතිව්ස් කීර්තිමත් ක්‍රිකට් දිවියක අවසානයට පැමිණ සිටින නමුත් ටෙස්ට් තරග නොලැබීම හේතුවෙන් ටෙස්ට් ලකුණු 10,000 සීමාව පසුකළ තෙවැනි ශ්‍රී ලාංකිකයා වීමේ බලාපොරොත්තුව ඔහුගෙන් ගිලිහී යමින් තිබේ.

තරග 116ක් සහ ඉනිම් 206කින් පසුව ශතක 16ක් සහ අර්ධ ශතක 44ක් සමඟින් ලකුණු 8042ක් ලබාගෙන ඇති මැතිව්ස්ට වඩා වැඩි ටෙස්ට් ලකුණු ලබාගෙන ඇත්තේ කුමාර් සංගක්කාර (12,400) සහ මහේල ජයවර්ධන (11,814) පමණි.

තවත් ලකුණු 1958ක් අවශ්‍යව තිබියදී මැතිව්ස්ට මෙම සන්ධිස්ථානය සාක්ෂාත් කර ගැනීම සඳහා ඉහළ සටනකට මුහුණ දීමට සිදුව තිබේ.

“මෙතරම් ටෙස්ට් තරඟ ලබා ගැනීමට නොහැකි වීම ඉතා කණගාටුදායකයි,” යනුවෙන් ඔහු පවසයි.

“ක්‍රිකට් කියන්නේ රිද්මයක්. දිගු විවේකයන් ක්‍රීඩකයන්ගේ වෘත්තීය ජීවිතයට බලපාන සෑම දෙයක්ම කඩාකප්පල් කරනවා. ICCය සහ SLCය මේ පිළිබඳ සොයා බලා වඩාත් සාධාරණ කාලසටහනක් සකස් කරනු ඇතැයි මම බලාපොරොත්තු වෙනවා” යනුවෙන් ඔහු ප්‍රකාශ කර තිබේ.