තමන් ‘වැග්නර්’ නම් රුසියානු කුලී හේවා කණ්ඩායමක් සමග යුක්රේනයේ මාස හයකට ආසන්න කාලයක් කටයුතු කළ බව රුසියානු රජයේ ප්‍රකාශක දිමිත්‍රි පෙස්කොව්ගේ 33 හැවිරිදි පුත්‍රයා පවසයි. වැග්නර් යනු රුසියාවේ “පෞද්ගලික හමුදා සමාගමක්” ලෙස හඳුන්වනු ඒකකයක් වන අතර, යුක්රේනයේ සිදු වූ බව කියන යුධ අපරාධ සහ වෙනත් අපයෝජනයන් සම්බන්ධයෙන් වැග්නර් කණ්ඩායම බටහිර රටවලින් චෝදනා ලබා ඇත. BBC පුවත් සේවය වාර්තා කර ඇති ආකාරයට රුසියානු සිරගෙවල්වල සිටින වැරදිකරුවන් දහස් ගණනක් එම කණ්ඩායමට බඳවාගෙන තිබේ.

රුසියානු ප්‍රභූ පැලැන්තියේ සාමාජිකයකු සාමාන්‍යයෙන් මෙවැනි කණ්ඩායමකට හෝ නිල හමුදාවන්ට සම්බන්ධ වන්නේ කලාතුරකිනි. ප්‍රභූ පැලැන්තියේ බොහෝ තරුණ පිරිස්, සාමාන්‍ය හමුදාවට බඳවා ගැනීමෙන් වැළැකි සිටීම සඳහා විදේශගත වී ඇත. නිකොලායි පෙස්කොව්, නිකොලායි චෝල්ස් ලෙසද හඳුන්වනු ලබන අතර, ලන්ඩනයේ වසර ගණනාවක් ගත කර ඇති චතුර ලෙස ඉංග්‍රීසි කතා කරන්නෙකි. ඔහු රුසියානු රාජ්‍ය පුවත් සේවය වන RT හි වාර්තාකරුවෙකු ලෙස සේවය කර ඇත. ඔහුට සහ ඔහුගේ පියාට එක්සත් ජනපදය විසින් සම්බාධක පනවා ඇත.